CM Pu Lalduhoma’n Lengpui Airport ram huam chhungah mimal ram nei an tam niin a sawi
04 March 2024: Chief Minister leh GAD changtu Pu Lalduhoma’n Lengpui Airport ram huam chhungah mimal ram nei an tam niin a sawi.
He thu hi vawiina Assembly thutkhawmah sawiin Pu Lalduhoma chuan Lengpui Airport chu midang kutah hlan dawn chuan a ram chin buai tam tak a awm a ti a, Mi thil ti thei tak tak te zingah LSC nei an awm tih sawiin heng hi Revenue Department-in a rang thei berin survey turin hma a la dawn a ti a, an zawh veleh an hung dawn tih sawiin GAD lamin a hung hna an buaipui dawn tih a sawi.
Chief Minister chuan Lengpui Airport midang kuta hlan a nih dawn chuan a ram chin chian a tul thu sawiin an hung dawn chuan khingtu pawh an ngah viau thei a ti a, Dik lo taka ram inpekna a awm thin avangin inhlanchhawn lehzelna turah buaina tam tak a awm phah tih a sawi.
Chief Minister chuan sorkar tharah Lengpui Airport chu bungraw phur service theihna turin a hranpa-a ruahmanna a la awm rih lo a ti a, enzui vat tum ani tih a sawi bawk. (AIR)
