Lairam Democratic Progressive Alliance chuan reiloteah Sawrkar ngialnghet din an inbeisei tih an sawi
March 30, 2024 : Lai Autonomous District Council Sawrkar buaina avanga Governor hnuaia LADC sawrkar thuneihna a awm hnu ah, Lairam Democratic Progressive Alliance chuan reiloteah Sawrkar ngialnghet leh langtlang, mipui Sawrkar din an inbeisei tih an sawi.
LADC sorkara buaina chungchang ah Lairam Democratic Progressive Alliance (LDPA) chuan vawiin khan thuchhuah siamin, LDPA chuan tuna LADC Term kallai ah, Seat 25 awm ah MNF chuan Seat 20 lain Pu Manghmunga Chinzah, CEM kaihhruai sawrkar an din a, MNF Legislature Party chhungah inphiarrukna a awm avangin sawrkar dinglai chu paihthlain MNF Legislature Party Pu V. Zirsanga kaihhruai sawrkar din a ni an ti a, MNF, MDC zingah inthliarhranna a nasa viau tih an thuchhuah ah tarlangin, eiruk thubuaiah CEM nilai chu vanduaithlak takin Court in thiamloh a chantir a, mahni inthiamlohna neia CEM atanga bang tura an beisei laiin a ban tak mai loh avangte, MNF Party atangin hmalakna a awmloh avangte in Party hrang hranga MDC 13 te chuan CEM in thlawptu a ngah tawklo tih Governor ah an thlen tih an sawi a, LADC ah Floor test nei tura ruahman a nih laiin CEM chuan banna thehlutin, hetihlai vel hian Lairam Democratic Progressive Alliance lama MDC pakhat chu lehlamah a pen tak avangin MDC 12 ve ve neiin sawrkar a ding thei ta lova, LADC thuneihna chu Governor in a laksak ta a ni an ti.
CEM chuan a ban hma leh thlawptu member a ngah tawhlo chungin hna nghet 20 dawnlai a la tih LDPA chuan an thuchhuah ah tarlangin pawi an tih thu an sawi a, hun reiloteah sawrkar nghialnghet leh langtlang, mipui sawrkar a din theih ngei an beisei tih an sawi. (DD)
