Lok Sabha thlanna neih turah Mizoram Kohhran Hruaitute Committee-in Mipuite hnenah thuchah an siam
28 March 2024: Kumin April ni 19-a Lok Sabha thlanna neih turah Mizoram Kohhran Hruaitute Committee (MKHC) chuan Mipuite hnenah inthlan thuchah siamin, thuchah hi Mizoram Mipui, Political Party leh Kohhran ten zawm turin an ngen.
MKHC chuan April ni 13-ah state pum huapin Kohhran inkhawmah tawngtai theuh turin an ngen a, tawngtai thupui atan inthlan tluang taka neih a nih theih nan leh Mizoram aiawhtu mi tha tak thlan chhuah a nih theih nan te, Mizoramah sakhaw zalenna tha tak a awm zel theih nan leh sakhaw pawl hrang hrangte intibuai lova, inrem taka an awm zel theih nan te leh India ramah Kristian-te rawngbawlna nekchepna leh harsatna siam zawnga hmalaknate hi a lo bo theih nan te tih a ni. Heng bakah hian Political Party leh Ram mipuite tan Lok Sabha inthlan chungchangah thuchhuah an siam tel bawk.
Zalen tak leh duh thlanna dik hmanga mitinin vote an thlak theih nan hel pawl leh ralthuam lam chi hman te, invau te, inbum te, sum sem te tih loh ni se tiin an ngenna an siam a, hnam bil zawng te, khawtlang inpumkhatna leh kohhran inunauna tichhe zawng tein eng pawl mahin hma lak loh ni se, mi mal leh pawl insawichhiat vak vak te, tharum thawhna chawk tho zawnga inelsen leh in auh nawmnah te tih loh ni se tih leh therhlo leh sum uma tumahin vote hralh loh ni se tiin an thuchhuah chuan a tarlang a ni.
