14 April 2024: Nimin Inrinni chawhma atanga tan Kohhran Thianghlim thalai pawl Youth Evangelical Front (YEF) Inkhawmpui, Davida Bãwkte, Ramthar venga neih chu zanin hian a tiak dawn.
YEF Inkhawmpui-ah hian thupui atan “Hnam siama lo la awm tur chuan Lalpa chu an fak ang” (Sam 102:8) hman a ni a; inkhawm apiangin thuchah sawitu Central YEF hruaitute atangin mi hrang hrang ruat thin an nih bakah mipui lam atangin a duh apiang tan Pathian thuchah puanchhuahna hun siam thin a ni bawk.
Vawiin Pathianni tuk inkhawm chu Central YEF Secretary Pu Lalruatsanga’n kaihruaiin, Central YEF Director Pu T.Lalhriattira’n thuchah a sawi a; Solomon Temple Choir [Aizawl] leh mimal zai te’n hun an hman bakah tlai lamah inkhawmpui ruai an kilho nghal a ni.
Zanin inkhawm chu Central YEF Member Tv Vanlaldingngheta’n kaihruaiin, thuchah sawitu bik awm lovin a duh apiang tan Pathian thuchah puanchhuahna hun an hawng dawn a ni.
Kumin 2024 YEF Inkhawmpui-ah hian Mizoram hmun hrang hrang atang leh Lunglei khawpui chhung atangin palai 700 chuang an tel a; inkhawmpui chhung hian Pathian thuchah an ngaihthlak bakah HIV/ AIDS chungchang inzirtirna leh Kohhran Thianghlim thalaite, kohhran-a rinawm tura inzirtirna hun an hmang bawk.
