Synod Office, J.M. Lloyd Hall Aizawl-ah tunhnai khan Mizorama Kohhrante Inpumkhatna (Council of Churches in Mizoram) Joint Committee an inhmukhawm a. Meeting hi Rev. R.Vanlalnghaka, Synod Moderator-in a kaihruai a, kohhran hrang paruk aiawh mi 37 an tel.
Meeting hian October, 2024-ah chuan Council hi anih dan tur angin ding fel hman tawh sela tiin an rel a. Programme tul ang leh Constitution chungchanga rel fel ngai te lo bawhzui hna chu Drafting Committee kuta dah a ni a, anni hi April 29, 2024 hian Lungleiah an thu khawm ang. Drafting Committee ruahmanna hi June 11, 2024-ah Joint Committee-in an la thlir ho leh dawn a ni.
Mizorama kohhrante inpumkhatna tur hian Missionary din kohhran pathumten bul an tan a, kohhran dang pawh sawm belh an ni bawk a. Tunah hian Council of Churches in Mizoram dinna tura kohhran tel mekte chu Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist kohhran, Evangelical Free Church of India, Isua Krista Kohhran, Bualpui(Ng) leh Salvation Army te an ni.
Council of Churches din leh a kalphung tur duante pawh kohhran hrang hranga Inkhawmpui lianten tha an ti tlang deuh vek tawh.
