“Infiamna kawng tinrengah Lunglei chu hma-hruaitu a ni” – MFA Honorary Vice-President
09 April 2024: HPC Cup Inter Village/Local Council Football Tournament vawi 13-na Final leh kharna hun chu nimin khan C.Thuamluaia Mual-ah hman a ni.
HPC Cup 2024 kharna inkhawm LDFA President Pu PC.Lalramnghaka kaihhruaiah hian khuallian Pu Lalsawma Pachuau, MFA Honorary Vice-President chuan thu sawiin, Zoram infiamna khawvelah hian Lunglei hi a pawimawh a; Mizo zinga National Referee hmasa ber Lunglei atangin kan nei a, India Football chu Lunglei tlangval Lallianzuala tello-in a kal thei tawh lo a ni tiin; infiamna kawng tinrengah Lunglei chu hmahruaitu a ni a ti. Pu Sawma chuan football hi inhuatna leh intihbuaina tur nilovin infiamna a ni tih hre reng chunga khel turin player-te a chah bawk a ni.
Khualzahawm Pu C.Lalremsanga, Sports & Youth Services Dept Jt.Director pawhin thu sawiin, Lunglei tana World Cup tih mai thin khelh chhunzawm a ni thei leh kumin bikah hmeichhe lam inelna telh a ni chu hmasawnna lian tak a ni tiin, infiammi te chu mahni inthunun thei tura huaisenna nunpui zel turin a chah a ni.
Mipa lam final hi Ramthar Local Council Team leh Zobawk South Local Council Team te’n khelin, Ramthar L.C hian 4-3 a Zobawk L.C hnehin an champion a. Hmeichhe lamah Theiriat Local Council chuan 6-1 a Vanhne V.C Team hnehin an champion bawk.
HPC Cup 2024 leh a vawi 13-na ni bawkah hian Mipa team 33 leh hmeichhe team 7 an telin; Pepsi Company-te’n an sponsor bawk a ni.
