India leh Myanmar ramria inkalpawhna khar tum chu Mizoram sawrkar-in a duh loh thu sawrkar laipuiah a thlen dawn
26 April 2024: Sawrkar laipuia Ministry of Home Affiars (MHA) thu angin India leh Myanmar ramria inkalpawhna te chu kumin May ni 1 atangin khar a ni dawn a, ram pahnih inkalpawhna khar a nih tur hi Mizoram sawrkar chuan a duh loh thu sawrkar laipuiah a thlen dawn.
Tunhnai khan Assam Rifles te chuan Darthlalang Tlang, Champhaia an camp-ah Tlangsam, Zote, Ngur, Ruantlang leh Hmunhmeltha khawtlang hruaitute bakah tlawmngai pawlte an kawm a, kumin May ni 1 atang hian India leh Myanmar inkalpawhnate khar a nih tur thu hi an hrilh a ni.
Ningani khan Mizoram Home Secretary H. Lalengmawia chuan, ram pahnih inkalpawhna khar tur chungchangah Mizoram sawrkarin sawrkar laipui atangin thudawn a neih loh thu a sawi a, tunhma angin Mizoram sawrkar chuan inkawlpawhna kawngte dan loh a duh reng tih a sawi bawk. Mizoram sawrkar chuan ramri khar an duh loh thu ziakin an thlen dawn tih a sawi a, hemi chungchanga hriattirna an dawng lo chu tha an tih loh thu a sawi bawk.
Ramri khar tum anih chhan hi chi hrang hrang a awm, chung zingah chuan Champhai District chhung atanga ruihhlo tawlh a nasa lutuk leh, Myanmar mi leh sa ten Mizoram kaltlanga ruihhlo an tawlh nasa lutuk chu dan leh emaw tih nep emaw tumna ni a sawi a ni.
Kumin February thla Mizoram Legislative Assembly Budget Session-ah khan Home Minister Pu K. Sapdanga official resolution “Sawrkar laipuiin Free Movement Regime (FMR) tih tawp a tum leh ramri hung a tum duh lohna” chu lungrual taka pawm a lo ni tawh a ni. (AIR)
