Rs Vbch 150 vel tihchingpen chungchangah MMFSL Area Business Manager leh midang 10 man an ni tawh
26 April 2024: Mizoram DGP Pu Anil Shukla chuan Mahindra & Mahindra Financial Services Ltd (MMFSL)-a Rs vbc 150 vel tihchingpen thubuai chu Mizoram mai ni lo, hmarchhak puma sum tihching-penna lian ber a nih thu a sawi.
DGP hian vawiin khan Aizawl-a DGP Conference Hall-ah thuthar thehdarhtute kawmin, hemi chungchang hi a sawifiah a; MMFSL Area Business Manager Pu Jakir Hussain, Trajpur, Assam mi chu bultumtu ber a ni tih hriatchhuah a nih thu sawiin; a thurualpui mi 10 an man tawh bakah mi paruk chu tan in-ah dah an ni tawh a, mi 5 chu thu zawhfiah atan Police-te’n an kawl tih a sawi. Mi 7 chu hnamdang an nih thu leh Mizoram mi 4 an awm tih a sawi bawk.
Pu Anil Shukla chuan March ni 20, 2024 khan MMFSL Circle Head Pu Ankit Bagree chuan Aizawl Police Station-ah FIR thehlutin; March ni 29 chuan MMFSL Business Head Pu Chanpreet Singh chuan PS Crime & Economic Offence-ah thubuai a thehlut ve bawk tih a sawi a; heng thubuai thehluh chungchang bawhzui tur hian Mizoram Police CID Crime te chuan Special Investigation Team (SIT) dinin, thu zawhfiah turin mi tam tak an ko a. MMFSL staff te thuzawhfiah an nih atangin Area Business Manager Pu Jakir Hussain, Tezpur mi, tuna Aizawl Tuikhuahtlang-a KV Tlangmawia Building-a khawsa mek leh midang 10 te chu man ta tih a sawi a ni.
Pu Jakir Hussain leh a thurualpuite hian document lem chi hrang hrang hmangin MMFSL-ah car loan an dil a, car loan ni siin tumah car pe chuang si lovin loan hi an la \hin tih leh document 2,000 dawn hmangin car loan hi an lachhuak tawh tih a sawi a; SIT-te chuan laptop 3, mobile-phone 10, customer file lem 549, seal lem 25, sim card 30 chuang, mi bumna identity document hrang hrang leh personal diary 2 an man tawh tih a sawi bawk.
He inbumnaah hian Aizawl-a car dealer hrang hrang 5– CK Motors Hyundai, NBE Tata, Rafael Nissan, Aidu Motors Renault leh Standard Motors te an inrawlh ve tih DGP chuan a sawi bawk a ni. (DD)
