19 May 2024: Pi Vanramchhuangi’n kuhva ro tawlhruk chungchanga Gauhati High Court-a Public Interest Litigation a thehluh kalzelah Court chuan Champhai Police Station Officer-in-charge chu insawifiah turin a hriattir.
Gauhati High court, division Bench, Chief Justice Vijay Bishnoi leh Justice Michael Zothankhuma thutna chuan PIL hi tunhnai khan a ngaihtuah leh a; Court chuan January ni 22-a an order-ah kuhva ro tawlhruk chungchangah, Petitioner leh respondent-te leh thu thehluh (affidavit) atangin an hmuhdan chiang taka an tarlan tawh hnuah, State Sorkar chu petitioner FIR thehluh chungchanga chhui chianna thar kalpui tura a tih hnuah leh FIR thar pawh an register theih thu, thupek anih hnuah pawh Petitioner FIR chu register chhunzawm loh a la ni leh zel chu a lungawi thlak loh hle a ti.
Court tarlan danin, Pi Vanramchhuangi FIR thehluh chu register lovin, investigation officer chuan a hmain CJM Champhaiah application thehlutin chhui phalna a dil a; chu application chu CJM Champhai chuan kum 2022 January ni 7-ah a hnawl sak a, chumi hnuah High Court chuan kumin January ni 22-ah order siamin, he order hi siam anih hnuah pawh CJM Champhai-ah tho chhui phalna Police lam chuan an dil leh a ni. Hei hi High court chuan January ni 22-a an order siam chu Officer-in-charge, Champhai chuan a zawm lo luih bakah State Sorkar chuan he thil hi a ngai thu tak tawk lo niin a tarlang.
Court chuan Champhai Police Station OC chu insawifiahna thehlut a, petitioner Pi Vanramchhuangi’n kum 2021-a FIR a thehluh chu tun thlenga register a nih loh chhan sawifiah turin a ti a. PIL hi kar thum hnuah ngaihtuah leh a ni ang. (DD)
