Mizoram-ah FCI-in vawikhata thla 8 ei khawp buhfai chhek khawlna hmun anei thei dawn
20 May 2024: Vawiin khan Pu B.Lalchhanzova, Minister, FCS & CA chu a pisaah Pu DP Shukla, Executive Director (North East) FCI leh a hoten hmuin FCI lam hian Mizorama an hnathawh mek dan leh an mamawh tulte Minister hnenah hian an thlen.
An mamawh an thlen zingah hian Dinthar Veng, Sairang a kudam (Buhfai quintal nuai 1 leng) an sak mek chungchanga Forest clearance avanga an buaina chuan kudam sak hna a tih thuanawp dan te an sawi a. Minister chuan LR&S hotuten he thil hi an buaipui sak mek thu leh Compensatory Afforestation atan ram an hmuh fel sak tawh thu a lo hrilh. Minister chuan Forest department lam hotute chu FCI-te’n kudam sak an chhunzawm theih nan an thlawpna a phut thu sawiin, buh leh bal a kan rin ber an nih avangin ngaihpawimawh a tul zia a sawi bawk. EF&CC pawn theihtawp an chhuahpui tur thu a sawi. Pu B.Lalchhanzova chuan Khawzawl a FCI kudam (Quintal 33400 leng) sakna hmun a lei nghet tawk lo nia sawi chu endik thuai a, a rang lama hma la turin FCI hotute a chah.
Pu DP Shukla chuan Dinthar veng, Sairang leh Khawzawl a kudam te sak zawh an nih chuan Mizoram-ah FCI-in vawikhata thla 8 ei khawp chhek khawlna hmun anei thei dawn tih sawiin, hei hian fur pui leh khuarel chhiatna dang vanga rail leh kawngpuiah harsatna te thlen mahse Mizoram chuan buhfaiah security a neih dawn thu a sawi bawk. Pu B. Lalchhanzova chuan FCI hotute chu a tul anga kudam Mizoram hmun laili deuhah sak belh dan tur ngaihtuah tura a tul thu sawiin, FCI hotute chuan anlo bawhzui tur thu an hrilh a ni.
Minister leh FCI Executive Director in kawmnaah hian FCS & CS, LR& S leh EF&CC department hotute leh FCI atangin Northeast leh Mizorama an hotute an tel a ni.
