31 May, 2024: Vawiin chawhnu dar 2:00 khan Government J Buana College, Lunglei chuan an college-a 6th semester zirlai chhuak tur mi 155-te thlahna hun, ‘Valedictory Day 2024’ an college multipurpose hall-ah an hmang a, Lunglei DC Pi Ramdinliani, IAS, chuan khuallian niin a hmanpui.
Khuallian chuan zirlai chhuak turte chu an hmalam hunah eng hlawhtlinna pawh chang se, midangte tana thiltha an tih si loh chuan awmzia a awm loh thu a sawi a. Zirna chu engtiklai pawha thlahthlam ngai lo tur leh zirnain tawp chin a neih loh avangin thil thar zir peih fo turin a chah a ni. Zirtirtute leh thawktu dangte pawh an hnathawhah zirlaite tan malsawmna ni zel turin a fuih bawk.
Government J Buana College Valedictory Day 2024 programme hi Dr. Judy Lalparmawii Khiangte, Asst. Professor, Department of English-in a host a, FC Lalhminghlua, Evangelical Union hruaituin hunserh a hmang.
Pu Lallianzuala, Principal chuan zirlaite chu an hma lam hun zel atan; a eng zawnga thil thlir thin tur leh taihmakna thlahthlam lo turin a fuih a. Dr.Vanlalhlani Ralte, Vice Principal pawhin zirlaite hnenah thil pathum – “Ka tihpalh” “Khawngaihin” “Ka lawm e” tih te chu midangte chunga lan chhuah tir theihnghilh ngai lo turin a chah a ni.
Government J Buana College Valedictory Day programme-ah hian Best Library User’s Award pek a ni a, chu lawmman chu Lalpekmawii, 6th Semester B.A (Mizo) in a dawng a ni.
6th Semester zirlai zinga mark hmusang ber Lalkhawngaihi, BA (Economics) chu Valedictorian atana thlan niin, ani hian Valedictory Address a sawi a. Zaithiam Ruthi Zonunsangi’n kalkhawmte a awi bawk.
Government J Buana College hi kum 1983 a din niin tunah hian Department 9 – English, Education, Economics, History, Mizo, Public Administration, Political Science, Geography leh Commerce an nei a, NAAC ranking B grade an nei bawk. Ministry of Rural Development hmalaknain an college campus-ah hian Lunglei District huamchhunga Rural Self Employment Training Institutes (R-SETI) na hmun dah a ni a, Computer hardware & networking, puanthui zirna leh entrepreneurship development programme zirna kalpui mek a ni bawk.
