03 June 2024: Vawiin khan Chief Minister Pu Lalduhoma hovin CM Conference Hall-ah Zoram Medical College tihhmasawn zel dan tur rel a ni.
Chief Minister chuan tun hnaia ruah leh thlipui vanga ZMC-in harsatna a tawk chu pawi a tih thu a sawi a. Engkim tluang taka a kal leh thuai theih nan theihtawp a lo chhuahpui thu leh vawiin thlenga a ngaihven zui reng thu a sawi.
ZMC thawktute pawhin, Disaster Management & Rehabilitation department leh department dangten ZMC harsatna tawhte chu an umzui tha hle tih Chief Minister hi an hrilh a ni.
He thutkhawmah hian ZMC kalphung thil pawimawhte sawi a ni bawk a. National Medical Council endikna an hmachhawn mek dan te, online inspection leh CCTV inspection a kal mek thute tarlan a ni a. ZMC behchhan Helipad leh Fire Station siam thuai chungchang te pawh an sawi a. ZMC hnathawktu, society hnuaia lak te leh Mizoram sawrkar hnuaia lakte felfai zawka enkawl dan tur pawh sawiin; kum 2019 a a zirchiangtu Committee-in report an lo siam tawh te sawi lan a ni a. ZMC thawktute hi Mizoram sawrkar hnuaia lakluh vek thain vawiin thutkhawm chuan a hria a. Council of Minister thuneihna a nih avangin Council of Ministers a ngaihtuah tura thlen ni se, tiin an rel a ni.
Vawiin thutkhawmah hian Health Minister Pi Lalrinpuii leh ZMC hotute bakah Finance, DP&AR, Health & Family Welfare leh Law & Judicial hotute an tel a ni. (AIR)
