05 March 2025: Chief Minister Pu Lalduhoma’n Sawhthing dahna hmun kudam hrang hrang leh Collection Centre a khah tawh avangin sawhthing lei an chawlh rih a ngai dawn a ti a, an hralh thawl hunah Sawhthing lei chu an chhunzawm leh dawn tih a sawi.
Vawiina Assembly thutkhawma zawhna leh chhanna hunah he thu hi sawiin Chief Minister chuan sawhthing an lakkhawm an dahna hmun chu a khah tawh avangin inhralh thawl phawt a ngai a ti a, a tahtawlin an tih dawn avangin kuthnathawktute hmanhmawh lo tura chahin an inhralh thawl hunah leh dahna tur a ruah velah sawhthing an lei chhunzawm dawn tih a sawi.
Pu Lalduhoma chuan sawhthing chu kumin chhunga tharchhuah chu an lei ngei dawn tih sawiin kuthnathawktute thlaphang lo turin a chah a, an lei sa chu hralhna tur an ngaihtuah tih a sawi.
Chief Minister chuan sawhthing chu Reliance Company in kg khatah Rs 80/- in an la a ti a, Kolkata-a Reliance Outlet-a zawrh turin sawhthing chauh lo thlai thar dang pawh an lei tih sawiin kumtluanin an duh reng a ti a, Mizoramah Collection Centre din an duh tih sawiin hralhna tur tha an hmu tih a sawi. (AIR)
