06 March 2025: Mizoram Legislative Assembly Budget session neih mekah Chief Minister Pu Lalduhoma, House Leader ni bawk chuan kawng siam danah kalphung thar Bituminous Concrete system an hman tawh thu a sawi.
Kawng siam danah Bituminous Concret-in paver kal theihna chin zawng zawng chu an ti tan tawh tih leh a tlo bik tawh dawn thu a sawi a, paver khawl kal theih lohnaah erawh tihngaihna a awm loh avangin kalphung hluia kawng siam a la ngaih thu a sawi bawk.
Mizoram kawng zawng zawng chu PWD siam a ni emaw, BRO emaw NHIDCL siam emaw pawh nise rigid pavement veka siam Ministry of Road Transport and Highway hnenah an dil thu a sawi a, an chhanna dawn pawh thu lawmawm lam nia an hriat thu a sawi bawk.
Chief Minister chuan tlema a hautak dawn thu leh estimate pawh siam that a ngaih dawn thu a sawi a, mahse a daih rei zawk dawn tih sawi bawkin, kum 10, 15 mai ni lo, kum 20-te rigid pavement chuan a daih thu a sawi bawk a ni. Phalsak an nih chuan chutiang vek chuan an tidawn tih leh, estimate awmsa tawh erawh a huam theih dawn loh thu a sawi bawk. (DD)
