Awmze neia thlawhna chuan man bituk tir turin Civil Aviation Ministry hotute ngen
20 Dec 2023: New Delhi a Parliament House Annexe ah nimin December ni 19 tlai khan Development of North Eastern Region (DONER) Ministry Consultative Committee ṭhutkhawmnaah Lok Sabha Member Pu C Lalrosanga chuan Mizoram leh hmarchhak state ṭhenkhata thlawhna chuan man to lutuk chungchang sawi chhuakin airlines-ten an duh ang anga thlawhna chuan man an ti to vak vak hi khualzinte tan phurrit nasa tak a tling a ni a ti a. Aizawl leh Delhi inkar thlawhna chuan man phei chu a sang tawh hle a ni a ti. Airlines hote chu Awmze neia thlawhna chuan man bituk tir tur leh thunun turin Civil Aviation Ministry hotute a ngen a. DONER Minister Pu G Kishan Reddy a chuan Pu Rosanga ngaihmawh chu ṭawmpuiin hmarchhak bial tan bik thlawhna chuan man tih tlem tir dan ngaihtuah turin meeting a tel Civil Aviation hotute chu a hrilh a ni. MP hian Lengpui airport runway siamṭhat chungchangah re-carpetting phahna tura senso ṭulte tum turin DONER Ministry hotute chu a ngen nghal bawk a ni.
Mizorama relkawng siambelh zel chungchangah MP Lok Sabha chuan Sairang aṭanga Lawngtlai District a Hmawngbuchhuah thlenga relkawng siamna tur Final Location Survey lak a ni dawn ta chu lawmawm a tih thu a sawi a. Bawhzui chak turin Railways thuneitute a ngen a. Bairabi leh Sairang inkar relkawng siam hna pawh chak taka thawh zel a ṭul thu a sawi a. Railwayas hotute chuan Sairang thleng tur relkawng hi nakum October thlaa zawh hman an tum thu DONER ṭhutkhawmnaa telte chu an hrilh a ni.
Mizorama kawngpui National Highways siam mekte chungchangah Pu C Lalrosanga chuan kum khat chhunga hnathawh theih hun chhung hrethiam leh chhut chunga National Highways lei laih leh paihna hnate thawh a ṭul thu a sawi a. Fur ruahtui tlain kawngpui siam hna a tihkhaihlak leh tihchhiat ṭhin dante hre chunga hnathawk thiam turin Ministry of Road Transport and Highways hnuaia hnathawk company leh contractor-te hriattir turin DONER hotute chu a ngen a ni.
DONER Ministry ṭhutkhawmnaah hian Pu Minister of State Pu BL Verma pawh a tel a. Hmarchhak biala DONER Consultative Committee member MP te bakah DONER Secretary Pu Chanchal Kumar, NEC Secretary Pu K Moses Chalai leh ministry hrang hrang hotute an tel a ni.
