20 Dec 2023: Vawiin chawhnu Dar 2:30 vel khan Pukpui Dai, Manguri Filling Station bulah Car pahnih Kwid leh EON an insu a, EON Car khalhtu Pu Lalrosiama (43) Lunglei Venghlun chu Vanduaithlak takin a thi.
Vawiin chawhnua Car insu te hi Aizawl lam atanga Lunglei lam pan Kwid Car leh Lunglei lam atanga Aizawl lam pan EON Car te an ni. Thudawn danin EON Carah hian a khalhtu Pu Lalrosiama Lunglei Venghlun leh midang pakhat chuangin Kwid Carah hian Pi F.Lalhlupuii D/o Pu F.Aizama, Rahsiveng bakah a fate 3 leh driver nen an vaiin mi 5 an chuang a, EON Car hian Manguri Filling Station bulah Kwid Car hi na takin a su niin mita hmutute chuan an sawi.
Rahsiveng atanga thudawn danin, EON car khalhtu Pu Lalrosiama hi rang takin Christian Hospital Serkawn panpui nimahse vanduaithlak takin a hliam tuar lovin a thi a, Kwid Car a chuang zingah mi pathum Pi F.Lalhlupuii leh a fanu bakah Driver-te chuan damdawi In a enkawl zui ngai khawpin hliam an tuar a, an driver hi Lunglei Civil Hospitalah CT Scan hmanga endik tura tih niin Lirthei a chung ve midang Pi F.Lalhlupuii fate 2 erawh chu hliam engmah tuar lovin In lamah dah nghal an ni.
Vanduaina tawk Pu Lalrosiama ruang hi Civil Hospital Lungleiah endik a ni anga, zaninah lumenin naktuk chhun dar 12:00-ah vui tura ruahman a ni a, Venghlun thlanmualah phum a ni ang. Pu Lalrosiama hian a nupui leh a fate a kalsan a ni.
