Mizoram BAR Association (MBA) Sub-Hqrs, Lunglei chuan thuchhuah siamin, Mizoram Sawrkar Cabinet Meeting Dt. 22.11.2022-a neih chuan District Court building, Lunglei sakna turin Trade & Commerce Office Building awmna chu Law & Judicial Department hnena hlan a lo remti tawh, an ti a. District Court building hi sak anih thuai theih nana chinfel ngaite chinfel anih theih nan Mizoram Sawrkar hnenah Dt.19.9.2023 khan kan duhnate kan thlen a, September ni 22, 2023 thleng hun kan pek laiin kan duh ang chhanna kan hmuh loh avangin Dt.25.9.2023 atangin tiamchin awm lovin District Court Office leh Zonal Geology & Mining Office kai turte kan dang dawn a; a tul dan azirin hma kan la chho zel dawn a ni, an ti.
MBA Sub-Hqrs, Lunglei chuan, Trade & Commerce building dinna, DC compound ami chu Court building sakna atan hman a nih thuai theih nan chak taka hma la turin Mizoram Sawrkar an phut a, District Court building sakna tura ruahman Judicial Office leh Trade & Commerce Office building awmna chu Pass hranpain Land Lease pakhata siam an phut bakah, Trade & Commerce building-a Zonal Geology & Mining Office dah thar chu a hma thei ang bera chhuah tirin, Judicial Office atan Mizoram Sawrkar-in kutthlak tan se, an ti bawk.
MBA Sub-Hqrs, Lunglei chuan, Peaceful Demonstration an neih chhung hian Lungleia Ukil zawng zawngten Court case an khawih dawn lo va, documents (Affidavit, Deed, Agreement, etc.) engmah an siam dawn lo va, Notary Public leh Bank hrang hrang Panel Lawyer-te pawhin legal paper engmah an khawih dawn lo tih an sawi a. Lunglei mipuite support-na leh hriatthiamna an ngen tih an sawi bawk.
