27 Feb 2024: Tukin khawvar hma khan Bilkhawthlir Sub-Hqrs MZP leh Bilkhawthlir Kuhva Chingtu Society-te hmalaknain dan lova tawlh Burma Kuhva rah leh a phurtu lirtheite man an ni.
Thudawn danin, Truck 7 vel Bilkhawthlir lam pana inzui chu MZP leh Bilkhawthlir Kuhva Chingtu Society duty-te chuan ringhlelin, Truck inzui 7 zinga a hnuhnung ber chu Bilkhawthlir kawn vengah ti dingin an endik a. He motor hian Burma Kuhva rah bag 50 a phur tih hmuhchhuah anih hnuah, Bilkhawthlir Police-te hriattir nghal an ni a, Kuhva phurtu motor leh a kuhva phurhte hi Bilkhawthlir Police Outpost-a lak an nih hnuah, nimin vek khan Kolasib DC Office-ah dah nghal a ni a, Kuhva rah phur Truck chhawmtu ni ngeia hriat Bolero leh a neitu a puh H.Ramengmawia Champhai Tlangsam veng ni a inchhal chu man a ni bawk.
Vairengte lam pana Truck inzui chungchang hi Kolasib SP hnenah hriattir nghal a ni a, SP hmalaknain Vairengte Police-te chuan an chhui zui nghal a, khaw chhak lam atanga Kuhva rah phurtu Truck pakhat atanga Kuhva rah hlang chhawng a, phailam pan tum Truck dang 1 chu manin, he Truck hian Kuhva rah bag 247 a phur a, naktukah Kolasib DC office-ah hruai a ni ang. (AIR)
