28 Nov 2023: Rorelna Dik Group te’n Mizoram Inthlanpui 2023-ah tu party pawh lo sawrkar se an manifesto leh intiamna te vil zui an tum tih a sawi.
Vawiin khan Aizawl Press Club-ah thuthar thehdarhtute kawmin Rorelna Dik Hmathlir leh ke penna tur hrang hrangte an tarlang a. He hunah Rorelna Dik Committee member Pu Lalrammawia chuan Mizoram Inthlanpui 2023 neih zawh takah tu party leh pawl pawhin sawrkarna lo siam se, ram rorelna an kalpuina kawngah mipui hnena an inzawrh lai leh an hmelmawi, an hmatheh hun laia kawng hrang hrang– ram hmasawnna ruhrel siam, sawrkar tha, eirukna do, zirna tha zawk siam, ram intodelhna kawng zawh hrang hranga an thutiamte, manifesto-te bawhzui a nih tur thute an tarlang a; hei bakah hian a tul huna an tha tichak tur leh kawng diklo an zawh chang pawha dodala hmalakna awm thei ang anga hma la turin Rorelna Dik Group chu din a nih thu a sawi a. Sawrkar thar lo piang tura chanvo chelh tur hrang hrangte, kohhran, para-church, NGO leh sawrkar hnathawk zawng zawngte chu Mizoram-ah rorelna dik a awm theih nana ke pena hmalak a tulna apiangah ke penpui turin a sawm a ni.
He hunah hian Rorelna Dik Group aiawhin Rev Zaidarhzauva, Rev Vanlalrova leh Dr JM.Vanlalhriata te an tel a ni.
