24 Feb 2024: Health Minister Pi Lalrinpuii chuan vawiin chawhma khan a thlawna khaw hrang hranga sem tur thosilen damdawia chiah, Long Lasting Insecticidal Nets (LLIN) chu MINECO Open Gym atangin a vailiam. LLIN thosilen hi Malaria laka kan invenna tur atana Global Fund (Global Fund to Fight AIDS, Tuberculosis and Malaria) sum bultuma National Vector Borne Diseases Control Programme (NVBDCP), Govt. of India kaltlanga hmuh niin, Mizoram tan 4,14,197 pek a ni.
Minister Pi Lalrinpuii chuan thu sawiin, malaria natna umbo tura India sawrkarin kawng hrang hranga hma a lak tawh dante leh Mizoramah pawh National Health Mission hnuaiah State Vector Borne Disease Control Programme (SVBDCP) ten ngawrh taka hma an la thin chu lawmawm a tih thu a sawi a. ‘Damdawi chiah thosilen’ sem chuan he natna tihtlem kawngah awmze thui tak a neih ngei a beisei thu a sawi. Health Minister chuan natna chi hrang hrang tireh a umbo tur chuan mithiamte ruahmanna siamte chu a hlawhtlin ngei theihna turin inrelbawlna chhawng hrang hranga thawktute’n a nih dan tur ang taka kalpui a, tihtak zetna nen an thawh a pawimawh thu a sawi a ni.
Vawiina vailiam tak LLIN thosilen hi kum dangah pawh sem thin lo ni tawhin, kumin 2024 March-April inkar hian Mizorama District 9 ah te mipui hman theih tura sem zawh hman tura hmalak mek a ni. Mizoram a khaw tinah ni lovin Malaria tamna khuaah te sem a ni dawn a ni. Mizoram hi Malaria chenchilh ram a la ni a.
Tun dinhmunah India ramah mi 1000 zel atanga Malaria vei hmuhchhuah zat atanga chhutin India rama Malaria tamna ber State nihna a hauh mek a ni. Nikum January December, 2023 chhung khan Malaria thisen exam zawng zawng zat 3,34,100 niin, Malaria vei hmuhchhuah mi 17,988 an awm a, nunna chan mi 13 an awm bawk.
