13 June 2024: Kum 2036 Olympics lo awm tur inbuatsaihna atana inrawnkhawmna, Mizoram Sports Conclave chu vawiin khan Aizawlah Chief Minister Pu Lalduhoma’n a hawng.
Mizoram State Sports Council leh Sorkar laipui Ministry of Youth Affairs and Sports tangkawp huaihawt Mizoram Sports Conclave 2024-Preparing Mizoram for Olympic Games 2036 hi Baptist Centre, Falkland-ah vawiin leh naktukah neih a ni dawn a, he hunah hian rampum huapa infiamna lama mithiam leh sorkar thuneitute bakah infiamna lama investor lian tak takte an tel a ni.
Khuallian, Mizoram Chief Minister Pu Lalduhoma chuan, Mizoram Sports Conclave chu Olympics 2036 neih tura Mizoram leh India tana hlawhtlinna hmahruai a ni a ti a, Mizoramah infiamna chu khawtlang nunphungin a ken tel, infiammi tha tak tak lo chher chhuak a, an dinhmun chawikangtu a ni a ti a, football-ah phei chuan rampum huap pawha inkhel thiam tha tak tak Mizoramin a chher chhuah tawh thu a sawi. Hei bakah hian Olympic Sports discipline hrang hranga Mizoramin hma a sawn theihnan, State sorkar policy hnuaiah Vision 2036 Olympics dah tum a ni a ti a, infrastructure tha leh coaching tha tak siam a ni dawn a ti bawk.
Hawnna hunah hian Sports Minister Pu Lalnghinglova Hmar, I&PR Minister Dr. Vanlalthlana, Meghalaya Sports Minister Shakliar Warjri, Assam Sports Minister Nandita Garlosa leh MLA, CS, Indian Olympic Association CEO Kalyan Chaubey leh Sports Association hruaitu hrang hrangte an tel a ni.
