August ni 30 kha Mizo Zaimi Inzawmkhawm (MZI) dincham vawi 43-na niin Lungleiah pawh MZI Hqrs chuan he ni pual hian hun an hmang.
MZI Hqrs Lunglei member-te chuan an pawl dincham vawi 43-na lawmna atan Lunglei khawpui hmarlam kawtchhuah Pukpui dai leh Kawmzawla an thingphun hungthat leh samfai hnatlang thawkin, hemi hnu hian an dincham lawmna leh intihlimna hun an hmang chhunzawm.
MZI Hqrs Lunglei President Pu P.Lalhmangaihzuala chuan MZI member-ten inlungrualna tha tak an neih thin avanga lawmawm a tih thu leh MZI Hqrs Lunglei chu khawtlang leh mimalte tan malsawmna an lo nih ve thin thu a sawi a, October thla tir lamah hranghlui zaithiamte chawimawina atan Oldies Night buatsaih an tum thu a sawi bawk.
MZI Hqrs Lunglei-in MZI dincham puala hun an hman bakah hian fahrah naupangte enkawlna Bethel Centre, Chhumliamkawn-ah tanpuina Rs 5,000/- an hlan bawk a ni.
