29 Nov 2023: Vawiin khan SAD Conference Hall, Aizawl-ah China rama Pneumonia hri lêng mek chungchang leh he hrilêng laka Mizoram a him theihna tura hmalak tulte sawiho a ni a. He hunah hian Health Dept Principal Secretary Pi Esther Lalruatkimi, Special Secretary Pu Vinay Kumar, Principal Director Dr Vanlalsawma bakah Health & Family Welfare Dept hotu lian te an tel a ni.
Health Dept Principal Secretary Pi Esther Lalruatkimi chuan China rama Pneumonia hri lêng vanga nausen thi an awm thu sawiin, sawrkar laipuia Ministry of Health & Family Welfare lamin a tul anga lo inpuahchah tura hriattirna an tihchhuah avangin keini lam pawh kan lo inbuatsaih a ngai a ni, a ti a. Union Ministry lam atanga lehkha rawn kalah pawh tun dinhmunah chiaina tur a awm loh thu an ziak tih sawiin, mipuite chu chi-ai lo turin a chah nghal a. Hmalam hun hriat lawk anih loh avangin kan phak tawk china lo inbuatsaih hi a pawimawh a ni, a ti. COVID hripui lèn laia inkaihhruaina dàn te kha fimkhur thilah zawm tur chin te ngaihtuah a, health sector-a thawktute dinhmun leh damdawi, hmanraw neih te lo inhrechiang tura hriattirna dawn a nih thu a sawi a ni.
Health Dept hotute chuan China rama Pneumonia hri lêng chu zirchian mek a nih thu sawiin, tun dinhmunah India ram tan hlauhthawn tur a awm rih lo nia a lan thu an sawi a. Chutih rualin inthlahdah chuang si lova India ram chhung, a bikin Mizoram hnaih state hrang hrangte dinhmun thlithlai reng a tul thu an sawi a ni.
Nimin meeting-ah hian Health Dept hnuaia thawktu hrang hrangte dinhmun bakah damdawiin hrang hrang, hmanraw neihte leh damdawi kawl mekte dinhmun sawiho a ni a; a tul anga inthuam chak dan turte rel a ni bawk. (DIPR)
