Mizoram state pawn, India ram chhungah leh khawvel ramdanga zinchhuah ve changin, an dawrpuia chawhmeh leh thei (fruit) zawrhte chîk pahin ka kal fo thin a. Mizote’n kan neih ve loh thei leh thlai an lo nei nualin, keini Mizote’n ei chi pawha kan ngaihloh leh ei en-a kan en loh, ei nachang kan lo hriat si loh, kan ram leilunga Siamtu Pathianin ram leilung fate tana a lo dah thil hi a lo awm nual \hin a; chutih rualin kan neih ve si loh thil te pawh ka hmu thin bawk.
Chung ‘thei leh thlai’ kan neih ve si loh te hmuh changin engtinnge kan ramah kan lakluh ang a, kan neih ve theih ang aw? tiin, kan ram leilung leh boruak ngeih chi tak Khuanu ruat leh siam thei leh thlai te chu engtinnge khawvel ramdangah kan thawn-chhuah (export) ang a, kan thei leh thlai thil te chu kan humhalhin, kan chin pun zel ang a, kum 100 dang lo la awm zel tur atan kan vawnhim leh chin pun belh zel ang tih te chu rilru-ah a lo lut fo thin a ni.
Keini aia ram leh hnam upa leh changkang zawk Vietnam rama ka zin tumin thingzung chi hrang hrang 70 vel damdawia atana an hman thin thu te leh dawra chung thing damdawi an zawrh tuarh te ka hmu a, kan ramah tam tak a awm ve ngeiin ka ring a ni. Vietnamese hote chuan Changkha hnah te hi phoro leh sawngbawl danglam hlekin, thingpui ang chi-a in (drink) tur leh damdawi atan an hmang nasa hle. Changkha hnah rep ro leh Moringa (drum stick) ang chi hnah her-dip pawh chu damdawi atan a tha, tiin an her-dip sa leh tuilum nena in mai theih turin an lo siamin, an zuar a; gram 250/500 vel lek te chu US$ 3-7 (India sum chuan Rs 300-500 inkar) man te a ni thin. Hetiang thei leh thlai ang chi te hi damdawi hmanga enkawl loh, “organic” a nih phei chuan aman a to duh viau thin a ni.
Cambodia rama an Changkha chu a lianin a sei deuh a, a kha ve lutuk lo, a kha ve sek na-in Mizoram-a tharchhuah Changkha a tluklo! Mizoram-a Changkha ang deuh, a hring tak dum lek lek, bawl deuh chi chu Japanese-ho siam “Aeon Shopping Mall” changkang leh lian deuhah an zuar thin a; Japan atanga organic farm atanga thar lakluh niin, a to viau mai. Chutiang Changkha chu ka hmuh changin, “Mizoram leilung leh tlangram lo atang ngeia tharchhuah, lei tha leh damdawi lam (fertilizer) chi pawlh lohva Zopa-in a Lo atanga tharchhuah ngei te chu han zuar ve thei ila chuan, a kha tui tha-in, organic vek a ni bawk si a, an duhin an va ngaisang dawn tehlul em!” tiin, ka ngaihtuah zui vawng vawng fo.
Phnom Penh khawpuia Aeon Shopping Mall changkang takah chuan “underwear” lam chi, T-shirt pan vâr leh taksa-a bel/hak nuam tak turte an lo zuar teuh a. Chung thil te ka han chîk zual chu a bulah nalh takin Japanese tawng leh English-in, “He thawmhnaw siamna hi damdawi hmanga sawngbawl ve miah loh leilung atanga la (cotton) thar-chhuah atanga siam a ni e…” tiin, la kung leh la pâr te chu colour-in a thlalak nen an lo târ tel vek mai a! Ka ngaihtuahna chu China rama la tharchhuahna hmunpui Xinjiang Province atanga Mizoram thlengin a vak vel ruai; “Aw ! heng la (cotton) hi kan rama loneitute’n damdawi (fertilizer) hmanga an enkawl leh chawm zui ni miah lo, an lo-ah an tharchhuah te chu Japanese pa hnenah han zuar thei ila, a tha-in a tangkai ang a,, Mizoram intodelhna tur khawp pawhin a tih theihin, a tharchhuah theih dawn hi maw le?” tiin ka ngaihtuah zui chiam. Ram changkang leh ropui leh mihring hmasawnna apiangah an hriselna (healthcare) an pawimawhin an ngaihtuah a, an ei leh in tur an uluk em em thin a lo ni. An ei châk zâwng leh tui tihzawng ni ringawt lovin, a hrisel tha leh an taksa tana tha tur ei leh in an chingin, an lo uar tawh zawk a ni.
Thufing pakhat chuan, “I ei duhzâwngin tunge i nih a tilang” a lo tih angin kan ei leh in duhzâwng te chuan kan mizia leh kan nihna leh kan chim phak chin te chu mi hriata sawi zuah zuah ngai kher lovin a tarlang thin a ni. Khawvelah hian thil vang leh hriselna atan pawimawh, thei leh thlai te hi a man a to duh em em a; Mizoram-a thei tui tak, vâng tak bawk si, “Theikhawkham” te hi lei tur reng ka la hmu fuh lo! Egypt leh Turkey atanga an lakluh thei chikhat chu Theikhawkham a angin ka han belchiang chu a lo ni lova. A man erawh a to phian thung a, 1kg kha US$ 20-40 inkar daih a ni.
Mizoram-a kan thei leh thlai te hi khawvel hmundangah a awm ve lo emaw, tharchhuah (product) tam lo takin a lo awm ve ang em? Horticulture or Agriculture Dept-a kan mithiam leh chinchang hre deuh te’n khawvel hmundanga an zin changte hian ngaihven deuh thin sela. Mi rama awm meuhlo, kan rama awm tam leh awm thei chi, thei leh thlai te chu humhalhin; chin pun belh zel tum ila. Hun lo kal zelah Zofate tan Mizoram tan thil tangkai tak a ni ngei ang.
He thu ka ziak lai hian kan naupan laia thei hming ka hriat, tun hnua ka hmuh ngai tawh si loh, an hmingte pawh ka lo theihnghilh nual tawh “thei” chi hrang hrang ka hriat ve chu rilru leh mitthlâ-ah an lo lang nual a; chung thei chu a kung te kitin kan lo tichereu-in, an rem zo tawh nge, chhandam ngai leh humhalh ngai takin khawimawi lai ramhnuai-ah te awmin emaw, a lo rem zo tawh zawk pawh a ni thei e. A theih ang angin Mizoram leilunga thei leh thlai awm te chu humhalh leh chin pun zel i tum tlat teh ang u.
Thei thenkhat phei chu mihringte tana damdawi tha tak, hrisel bawk si, ramdanga thawnchhuah (export) tlak pawh a lo ni mial mai thei asin?!
Hnam mawl tawh si lo, fing law law ni bawk si lo, hun inthlakthleng (transition period)-ah Mizo hnam te kan awm mek avangin kan fin leh changkan huna kan chhuan em em tur leh roh leh ngaihhlut tur te chu kan lo tichereu zo palh mai ang? tih a hlauhawm em em a ni. Chuvangin, thei leh thlai leh ramsa leh sava humhalh thlengin, mi tinrengin mawhphurhna lian tak kan nei theuh tih hre tharin, i hre reng ang u. Mizoram leh hnam hi a boral a nih chuan nang leh kei hi a tuartu kan ni dawn tho a. Vawiina kan hausakna te leh nawmsakna chi hrang hrangte hi awmze neilo a la ni thei ang.
Heng a hnuaia thei (fruit) te hi mimal, pawl leh khua leh sawrkar anga tangrualin humhalh i tum tlat ang u. Keini Zofate’n kan humhalh loh chuan tu hnamdang mahin min rawn humhalh sak dawn hauhlo a ni.
(1) Sarzuk, (2) Chengkek, (3) Theiherhawt, (4) Khawmhma, (5) Vuakdup, (6) Theikum, (7) Theiria, (8) Theipalingkawh, (9) Tuaitrit, (10) Bil, (11) Theichhungsen, (12) Keifang, (13) Sialinuchhu, (14) Theitat, (15) Tuaihabeh (Yellow Mangosteen), (16) Theihai chi hrang “Haite, Haimual, Haifavang” tih te pawh kan nei a; heng Theihai hi an len dan leh pian hmang leh a tui dan a inanglo vek. Kan humhalh-a kan chin pun chuan thil hlu leh tangkai tak, kan ram leh hnam tan an la ni thei vek dawn a ni.
Cambodia ramah Theihai chi 5 chuang an nei a; an ram lum vang nge kum tluanin, December – January thla-ah pawh Theihai pâr leh a rah hmuh tur a awm. South Korea-ah metric ton engemawzat company-in an thawnchhuak (export)-in, South Korea-in a lalut (import) nasa thin a ni.
Heng Mizorama thei (fruit) chi hrang hrang awm te hi farm neitu/siamtu-te’n mahni farm-ah kung 10-100 emaw theuh tal neiin humhalh nan chingin tipung sela, hun lo kal turah a va hlu dawn em!
Kan ram leilung nena inzawm tlat intodelhna leh hmasawnna ‘buh leh bal’ ah te, ‘thei leh thlai’ thar chhuahna tel lo chuan Mizoram chu ke-bai ang maiin a awm reng ang!
