01 April 2024: Zoram People’s Movement chuan vawiin khan Lok Sabha inthlan campaign bul an tan a, ZPM Leader, Chief Minister Pu Lalduhoma chuan hnam leh sakhaw tana him chin zelah sawrkar laipui tha taka thawhpui an tum tih a sawi.
ZPM Party-in Vanapa Hall-a Lok Sabha Election campaign beihpui thlak tannaah hian ZPM President Pu Lalliansawta chuan a khuh a hawng a, hun hmanpuitu Chief Minister Pu Lalduhoma chuan, Central chu sum leh pai mamawh petu ber an nih avangin biak chhiat an tum loh thu sawiin hnam leh sakhaw tana him chin zelah thawhpuiin that leh thata inlawm tawn an tum a ni, a ti.
ZPM MP Candidate Pu Richard Vanlalhmangaiha pawhin thu sawiin, ZPM Party chu Mizoram mipuiten enchhin an tum lova, en tak tak an tum a ni, a ti a. Sawrkar laipui leh state sawrkar pahnih inkara thawk tur a nih angin leilawn nghet tak nih a tum, a ti a. State budget-ah hmasawnna hnathawhna tur a tlem avangin project leh scheme a tam thei ang ber sawrkar laipui atangin hai chhuah a tum tur thu a sawi a. Zo hnahthlak zawng zawng MP nih a tum thu a sawi bawk.
