Anthurium Festival; Reiekah leh Ailawngah nghat dawn

16 Sept 2026: Tourism Minister Pu Lalnghinglova Hmar hovin vawiin khan a pisaah Anthurium Festival neih dan tur chungchang mi pawimawh ten an rel.

October ni 1 atanga October ni 3 chhunga neih tur he festival hi Reiekah leh Ailawngah nghah a ni dawn a. Tourism Minister Pu Lalnghinglova Hmar chuan he Festival hi Tourism leh Horticulture Department bultuma neih tur ni mah se, Mizoram sawrkar buatsaih a nih angin sawrkar department zawng zawng te leh Mizoram mipuite kan tel vek a ni, a ti. Mizoramah tourism a ṭhang nasa a, khualzin an pung a, sum leh pai chevel a pung a; a hlawkna teltute chu dawrkai te, taxi driver te, thingpui dawr neitute, Mizo mipuite kan ni, a ti a. He Anthurium Festival-ah pawh hian tualchhung mai bakah state pawn aṭangin tourist a tam thei ang ber an kal theih nan festival hlawhtling tak buatsaih turin ṭan kan lak a ngai a ni, a ti.

Meeting-ah hian department hrang hrang te, YMA te, Reiek leh Ailawng khawtlang hruaitute, Zo Anthurium Grower Society te, event management team te leh Mizo Indigenous Games hruaitute an tel a. An tihtur leh mawhphurhna hrang hrang te, an thlen chhin te leh inbuatsaih dan te meeting-ah hian an report a ni.

He Festival-ah hian cultural programme bakah adventure lam hawi – trekking, cave exploration (Khuangchera Puk, Thawmpawnga Puk and Ngaitei Puk), silai inkahsiak leh a dangte a awm ang a. Naupang infiamna hmun te, pangpar huan tlawh tur te, Mizo Infiamna chi hrang hrang entir leh festival chhimtute tana tel ve theihna tur thil chi hrang hrang siam tum a ni a. Mizo zaithiam lar te sawmin Leikapui Night leh a kharna concert ropui tak buatsaih tum a ni bawk.

Meeting-ah hian lirthei chevel chungchanga harsatna tawh theihte thlirlawk niin traffic management chungchang te leh kawng chei ṭhat chungchang te sawiho a ni a. Festival chhunga lirthei che vel a tam dawn avangin festival chhim turte bakah Reiek kawng paltlang ngai zin veivakten harsatna an tawh lohna turin ngenna leh hriattirna Travel Advisory tihchhuah ni se, tiin meeting ah hian an rel a ni.