23 May 2024: Mizoram hmun hrang hranga Vawk pul hri ASF leng mek chuan Lunglei District bikah chuan nghawng a la neilo tih Dr.Vanlalhruaia District Veterinary Officer chuan kan palai a hrilh.
Dr. Vanlalhruaia chuan tunlaia ASF leng mek chuan Lunglei District a la tibuai lo tiin; ASF-in Lunglei District a lo thleng anih pawha a theih ang anga hmala nghal turin Department lam chu an inring lawk reng a ti.
Hetihlai hian Lunglei khawpui bikah vawka intodelhna a pung chho a, vawk pum man a tlak hniam hret hret bakah, vawk note man Rs 8,000 ni thin chu tun dinhmunah Rs 6,500 atanga 5,000-ah tlahniam mekin, heti chung hian vawkpui vulhtu tam tak chuan an vawk note hralhna an hmu mumal tawh lo nia sawi a ni.
Vawksa kg 1 Rs 500 a hralh thin pawh Rs 400-ah tlahniam tawhin, vawksa man a tlakhniam hnu hian Zirtawpni leh Inrinni ah te chuan khawpui chhung veng hrang hranga vawksa zuarte chuan vawksa hi an hralh kal lutuk thei lo va nilengin an thutpui thin niin thudawnna chuan a sawi.
Inrinni tinin Lunglei khawpui chhungah hian chawhrualin vawk 190 vel talh thina ngaih a ni.
