Central YLA chuan dan kalha Myanmar-a Diesel leh Petrol hralh a nih loh nan hma an la zel
16 July 2024: Central Young Lai Association chuan dan kalha Myanmar-a Diesel leh Petrol hralh a nih loh nana hma an lak an kalpui zelah nizan khan Siahaa dah tur diesel phur tanker pahnih chu venhimna hnuaiah chhuah a ni.
Lawngtlai bul 71 RCC Camp piaha YLA leh Police Duty na hmunah Tanker pahnih, diesel phur ve ve AS -01 DC-6111 Emanuel Pump Siahaa dah tur leh AS 11-DC-6164 J. Rama Pump Siahaa dah tur te chu duty ten ngun taka an lehkhate an enfel hnuah, Myanmar lama chhehrelh tur nitheia ngaih a nih loh vangin chhuah a ni.
Eng emaw palhah heng Diesel phur Tanker te hi an dahna hmun an thlen hma a khawih chingpen palh hlauhthawn thilah venhimna hnuaiah kaltir an ni a. Lawngtlai Police ten Kawlchaw thleng an veng a, Kawlchaw atangin Kawlchawa Police duty ten Siahaa an dahna tur hmun thleng an veng thung a, heng Tanker pahnihte hi nizan dar 9:40 khan Duty Post atangin chhuah an ni a, YLA Duty ten DCSO Siaha hnenah an hrilh hre bawk a ni.
Nimin khan YLA Diltlang Sub-Hqrs duty chuan Lirthei pahnih atangin Diesel barrel 19 an man a, Diesel phurh nana motor hman hi YLA hruaituten an sawidanin MZ 05B 0981 (Yoda) leh MZ 02C 2772 (Pickup) niin, Motor neitu hi Luangmual, Lunglei ni a sawi a ni a. Diesel hi Lunglei atanga phurh niin, Chawngte paltlangin Diltlang lamah kalpui a ni a, YLA Duty ten an lo man a, Myanmar a hralh tur ngei a ni tih YLA hruaitute chuan an sawi a ni. Diesel an man te hi Police Beat Post, Diltlangah dahthat niin, a phurhna Motor leh Driver te erawh chhuah zalen an ni. (AIR)
