Chhuanlam a awm thei tawh dawn lo tih NHIDCL leh contractor-te chah

06 Oct 2026: Vawiin khan Lunglei District Bawrhsap Pi Navneet Mann hovin a hna thawh pindanah sawrkar official-te, National Highways & Infrastructure Development Corporation Ltd (NHIDCL) hotute leh contractor – ABCI Infrastructures Pvt Ltd leh BRN Infrastructures Pvt Ltd hotute an ṭhu khawm a. Lunglei District chhunga national highway kawngpui zauh leh siam ṭhat hna kal meka hna thawh dinhmun leh hmachhawpte an sawi ho.

Bawrhsap Pi Navneet Mann chuan fur ruahtui a hul chhoh tawh avangin kawng laih leh siam chungchangah chhuanlam a awm thei tawh dawn lo tih sawiin, NHIDCL leh contractor-te chu hna thawhna hun ṭha chu chhawr ṭangkai tur leh ruahmanna fel tak siam a, ṭhal chhunga a tam thei ang ber hna thawh tum turin a chah a. An hna thawh dan tur duan lawkte chu a taka an tihhlawhtlin leh tihhlawhtlin loh vil zui reng a nih dawn thu leh an thawh ṭhat loh chuan a ṭul anga an lakah hma lak zel a nih dawn thu hrilhin, a hma laknate DC hnenah a hun taka hriattir zel turin a chah.

He ṭhutkhawmah hian Lunglei District Superintendent of Police Pu Shivam Siddharth leh Assistant Commissioner (Revenue) Pi Jennifer Vanlalhruaii Pachuau te bakah, DIPRO, SDC i/c DDMA leh DC leh Revenue-a thawktute, NHIDCL General Manager (P)-te, ABCIIPL Sr General Manager leh BRNIPL Project Manager te an tel a ni.