21 Dec 2023: MZI, Hqrs Lunglei, MZP Hqrs Lunglei leh MSU Regional Hqrs Lunglei tangkawp ten December ni 19, 2023 Mobile Charity Concert an neih atanga an sum hmuh atangin vawiin tlai khan chhungkaw 39-te hnenah Krismas thilpek sumfai an hlan.
Krismas thilpek hlanna inkhawm hi vawiin tlai dar 3:00 khan Silver Mount School Ramthar veng Lungleiah neih niin inkhawm hi Pu Lalkunga Pachuau, MZI Hqrs Lunglei Vice President-in a kaihruai a. MZI Hqrs Lunglei President Pu P.Lalhmangaihzuala chuan, MZI-te hian zaithiamte inpekna hmangin kumtinin midangte tan kan phak tawkin kan lo luangchhuak ve thin a, hetianga midangte tana kan inpekna a hlawhtlin theihna tura thahnemngai taka min thawhpui thintu MZP leh MSU te chungah lawmthu kan sawi a, an ni tello chuan MZI ringawt hi midangte tan malsawmna kan tling zo thin lo a ti.
MZI Lunglei President Pu Hmaa chuan nikum lamah Lunglei khawpui chhung veng hrang hrang atangin chhungkaw harsa zual mi 50 hnenah tanpuina hi pek anih laiin kuminàh chuan nikum lam aia sum hmuh a tlem avangin chhungkaw 39 chauh kan pe thei ta a ni a ti a, hetiang ti thei tura an hmalakna thlawptu Lunglei mipuite chungah lawmthu sawiin, tanpuina dawngtu zawng zawngte pawhin tangkai taka an hmana Krismas hlim taka an hman phahna hmanraw tangkai a nih ngei a beisei thu a sawi.
Vawiina tanpuina dawngtute hi Lunglei khawpui chhung veng hrang hrang atanga chhungkaw khawsak harsa zual thlanchhuah te niin, tanpuina hi he hun hmanpuitu Pu Lalzuithanga Chairman LMC leh MZP, MSU leh MZI hruaituten hlanin Pi Lalenkawli Pautu leh zaithiam dangten zaiin kalkhawmte an awi a, thilpek dawngtute aiawhin thusawi ngaihthlak a ni bawk.
