“Chingal leh Saum lovin; dawt hmangin Sawhthing an bawl” – MNF Sub Hqrs Lunglei Vice Pre.
15 Oct 2025: “ZPM Sawrkarin a market hre sa leh thlai thar hralhna budget-ah dah tawh anga insawi siin tun thlengin sawhthing hralhtu (kut hnathawktu) te hnenah support price a pe kim thei lo hi a mak hle. ZPM sawrkar hian sawhthing a leinaah hian District tinah Co-opted member pakhat zel a dah theuh a, PCC leh SCC a nei vek bawk a, chuti chung chuan engtin nge SCC thenkhatah fel lo awmin vbch 4 atanga vbch 5 sum chingpen a awm theih? Kuthnathawktu harsa zawkte’n support price nghakhlel taka an thlir laia a market kalkawng sum heti zat chingpen a, kut hnathawktuten an tuar hi MNF Sub Hqrs Lunglei chuan hriatthiam har a tiin a ranglama action la tur leh a tul a nih phei chuan CBI hial chhui tir turin kan phut tlat a ni,” Pu Chawngthanmawia, Vice President MNF Sub Hqrs Lunglei chuan a ti.
Vawiin chawhma dar 11:30 khan Mizo Hnam Run Lungleiah 29.11.2025 Nilaini-a rampum huapa Total Bandh MNF-in a neih turah Mizo National Youth Front, Mizo National Women Front, Mizo National Senior Front, Sub Hqrs Lungei te, Ex Mizo National Army, Southern Headquarters te nen thlirlawkna hun hman niin, he hun hi Pu Vanlalhmuaka, President chuan a kaihhriai a, Pu Chawngthanmawia Vice President-in thu a sawi.
Pu Chawngthana chuan, “Lunglei-a ZPM MLA pali te hian Lunglei District chhunga support price la dawnglote hi ngaihven rawh se, engkim ruahmanna fel sa nia sawi a, kawtkaia sawhthing lei tiamtute hian chingal leh saum hmang lovin, thudik nge thutak tih pawh hriat theih lohin sawhthing hi an bawl kual vel mai mai a ni” a ti bawk.
