17 May 2024: Civil Hospital Lungleiah Cabin luah man tihsan tum niin; inzaina room-a luh man siam tum a ni bawk.
Hemi chungchanga Medical Superintendent Office a thawktute sawi danin, Hospital mahni a inenkawlna sum RKS Fund chu Central atangin tam vaklo hmuh thin a ni a, RKS sum hi hospital mamawh chi hrang hrang atana hman thin a ni, an ti.
Hetiang anih avang hian mahni-a Hospital inenkawlna sum indaihlohna hi a nasa thin em em a, State Sawrkar atanga a hrana tanpuina a awm bawk siloh avangin tunhnaia District Level RKS Committee; Chairman D.C hova neih chuan Civil Hospital inenkawlna sum RKS Fund indaihlohna nasa zualpui phuhruk nan Operation Theatre luh man siam ni tawh se; hei bakah hian Cabin luahman Rs 500 chu Rs 800-ah tihsan nise tih a nih thu an sawi.
Operation Theatre luh man hi Doctors Meeting chuan mumal zawkin a la siam dawn tih thawktute chuan sawi bawkin, Operation Case azirin rate siam tum anih thu leh exemption list pawh siam tum a ni an ti.
BPL Family leh mi harsa hriatthiam ngai chin nia ngaihte tan chuan chawi kher angai dawn lo va, mi zawng zawng tan Operation Theatre luh man hi an chawi kher a tul dawn lo an ti. Operation Theatre luh man chawite pawhin Golden Card an neih chuan sawrkarin a tum sak vek dawn tih Medical Supdt Office thawktute chuan sawi bawkin, mipuite chu sawrkarin Health Care Scheme leh Health Policy hrang hrang a siamte ngaihpawimawhna chang hriata mamawh huna a taka chhawrtu ni thei tura ngaihven nachang hre tura an duh thu an sawi a ni.
