11 Dec 2023: Vawiina ZPM Party Office-a chhung inkhawmah thu sawiin Pu Lalduhoma chuan ni 100 chhunga tih tur an puan te khawng takin an kalpui dawn, a ti a. An hnathawh atangin mipuiin endik se an duh thu leh state puma rual taka mipui an kal tlân theih nan thianghlim takin hma an la dawn, a ti. Inthlan zawh takah an beisei aia tlem an tling tih sawiin an tlin lohna tam tak chu sum leh pai vang a ni, a ti a. Sawrkar siamtu ni mah se sum leh pai hmangin vote an zawng ve dawn lo tih sawiin party ruih chilhna kalsan a ngai, a ti.
Chief Minister-in works department a chang lovang, an lo tih tawh avangin works department a chang lova, bial tin a enkawlpui vek dawn a, Mizoram mipuite beiseina chu tih thlawn an tum lo tih a sawi a. Mipui sawrkarah chuan Minister leh MLA an inthlau dawn lova, MLA-ten Department an enkawl dawn loh avangin bial tan leh ram mipui tan theihtawpin an thawk thei zawk dawn a, kalphung tharah chuan eng hna pawh a tha hle tur a ni, a ti bawk.
Local Administration Department Minister Pu C.Lalsawivunga pawhin ZPM chhung inkhawmah hian thu sawiin, mipui sawrkar tha tak an din zia a chanpual atangin lantir a tum dawn a, theihtawp a chhuah tur thu a sawi.
Education Minister Dr. Vanlalthlana chuan dik taka sawrkar kaihhruai an tum dawn, a ti a. A department enkawlah party induhsakna a awm dawn lo tih sawiin mipuite chu thurawn pea tawngtaipui turin a sawm a ni.
ZPM chhung inkhawm hi President Pu Lalliansawta’n a kaihruai a ni. [AIR Aizawl]
