Compensation la vek tawh, in la thiat duhlote chungah hriatthiamna nei tawh dawn lo
17 Jan 2024: Vawiin chawhnu dar 1:00 khan Lunglei District bawrhsap leh Competent Authority for Land Acquisition (CALA) ni bawk Pi Ramdinliani chuan DC conference Hall-ah Lunglei District chhunga NH54 kawngpuiin a paltlang khua VC te leh NHIDCL aiawhte meeting a neih pui.
Pi Ramdini chuan NH54 laih hna thawk mek NHIDCL-te chu sorkar laipui atangin an NH54 laih hna thawh mek chu kumin March thla chhunga zawh vek tura thupek an nih tawh avangin Zangnadawmna chungchangah thil tihfel tur awm ang ang te chu tihfel thuai a, NHIDCL-te pawh an hnathawhah harsatna tawk lova an hna March thla ral hma ngeia an zawh a tul tawh avanga meeting hi koh a ni thu tarlangin; tuten emaw harsatna an siam avanga NHIDCL-ten an hna zo hman lovin emaw zangnadawmna hmu ve ngei tur thenkhatten hmu hman lova min hawsan chuan a pawi hle dawn. Chuvangin chutiang thil a thlen loh nan meetingah hian rel tur pawimawh leh bawhzui ngai leh hmalakna tur awm reng reng chu chipchiar taka rel kan tum dawn a ni, a ti.
Vawiin meetingah hian PHE-in Jal Jivan Mission (JJM) hnuaia Lunglei District hnuaia thingtlang khuaa In tina tui connection pek vek tura an hmalaknaah 99% an hlawhtling tawh a, a bak 1% chu NH54 laih mek avanga hna chhunzawm thei lo an nih thu tarlan a ni a. JJM hnuaia data leh NHIDCL data te compare a zirchian a ni. Compensation la dawng lo te tan complaint estimate thehluh tawh a nih thu te, thehluh tawh pawisa la dawng lo bawhzui dan turte, estimate siam that ngai leh survey laia hmaihpalh te thun dan tur leh compensation kaihhnawih thil leh harsatna hrang hrangte sawiho a ni.
Pi Ramdinin chuan compensation la vek tawh leh eviction order pawh pek tawh, tun thlenga in la thiat duh lo te chungah District Administration-in zahngaihna leh hriatthiamna an neih tawh loh tur thu sawiin, Court a kal awm mahse court-in stay order a chhuah loh chuan kan hmalakna tur a dal dawn lo, Arbitrator chuan compensation amount-ah chuan inrawlh theihna a nei a, In thiah leh thiah loh turah engmah a inrawlh dawn lo. Chuvangin VC te chu an area theuh va, In thiat turte chu CALA-in Dan anga an in thiahsak a, case awrh tir kher an ngaih loh nan an in te lo thiat lawka, an hmanrua la hman tlak te lo insenghawi lawk vek tur leh, chu chu kan za vaia that tlanna tur ber tur a nih thu, lo puangzar theuh turin a hrilh hlawm a ni.
Pi Ramdini chuan a mal mal (piece meal) a fresh Compensation leh re-estimate dilna thehluh hi NHIDCL hian a lo hnawl thin avangin, zangadawmna kaihnawih thil reng reng a hlawmin NHIDCL kan thawn dawn a, tun bak hi chance a awm tawh dawn lo. Compensation channel pangaia kal chuan kan tlai tawh dawn avangin NHIDCL-te’n compensation aiah Direct purchase a kalpui an remti tawh a, hemi atana bawhzui ngai thilte chu a concern dept. te, NHIDCL-te leh Compensation diltute nen inberawn zelin, rang zawkin bawhzui ngai chu bawhzui nghal a ni ang, a ti.
NHIDCL aiawh leh Khaw tin atanga VC member kalkhawmte chuan anmahni khua theuh va compensation dawng tawh te, la dawng lo te, re-estimate dil te, a thara dil te, te, harsatna hrang hrang an tawh te etc. report an pe a. Khaw tina harsatna an tawhte chu uluk taka zirho a sawi ho a ni. VC te leh NHIDCL aiawh chuan an harsatna tawhte sukiang tura DC hmalak tum dan chu lawmawm an tih thu DC chu hrilhin, Sorkar leh NHIDCL official-te puibawm tura an inpeih reng thu leh meeting chu hlawkthlak an tih thu an sawi bawk. DC pawhin VC te, khawtlang hruaitute leh khawtlang mipuiten Lunglei District chhunga kawng tha a awm theihna tura CALA hmalakna an thlawp tlat avangin lawmthu a sawi bawk a ni.
