11 April 2024: ZPM Legal Dept. Gen. Hqrs chuan Social media-a ZPM candidate Pu Richard Vanlalhmangaiha beihna chu an ngawihbopui dawn lo tih leh Criminal complaint thehluh an tum tih an sawi.
Vawiin khan thuthar thehdarhtute kawmin ZPM Legal Dept. Gen. Hqrs chuan April ni 10, 2024 khan David Sailo intiin Facebook a thuziah, kum 2011 leh 2012 bawr vela MAMCO Deputy Manager (Marketing) Pu Lalremthanga leh MAMCO Consultant nia chhal Mustaqur Rahman, Guwahati-te’n Contract hna pek chungchanga inbumna case chinfel tawh, hremna pawh pek tawh kaihhnawihah ZPM MP Candidate sawi luh ve talh tumna chu nasa takin a darh tih a sawi a, Tuesday Nightmare Youtube Channel chuan tu tute emaw phone be kualin, an inbiakna record chu thehdarh anih bakah case pawh la kal mek anga sawi zuiin a thehdarh leh bawk tih leh hei hi thil tha lo tak leh Politics-a dawt hmanga inbeihna tenawm tak a ni tih an sawi bawk.
David Sailo inti leh Tuesday Nightmare Youtuber-te’n an sawi thubuai hi chinfel anih tawh thu leh he thubuaiah hian Pu Richard Vanlalhmangaiha hi inhnamhnawih ve ni se a lakah thubuai siamsak lohna chhan tur a awm lo tih an sawi a, case intan laia ruling party chu Congress an ni a, thubuai ngaihtuah hun lai chu MNF rorel lai niin, thuthlukna siam hun pawh MNF Party rorel hun lai a ni bawk tih an sawi. (DD)
