14 Aug 2025: India rama sawrkar damdawi In ṭha bik tehnaah Ṭawipui Primary Health Centre a tling thar a, heti hian Mizoram chhunga HWC-PHC 58 awm zinga 29 chuan National Quality Assurance Standards (NQAS) certificate an nei tawh.
National Quality Assurance Standards (NQAS) certified damdawi In te hi endikna chhawng thum paltlang an ni a, a tawp bera endikna an hmachhawn hi National External Assessment a ni a, hetah hian 70% an hmuh chuan certified an ni chauh ṭhin.
Dr. Lily Chhakchhuak, Mission Director, National Health Mission, Health & Family Welfare Department chuan India rama sawrkar damdawi in ṭha bik tehna, NQAS-ah Ṭawipui PHC chuan 84.78% an hmu tih a sawi.
Heti hian Mizoram chhunga Sawrkar damdawi in 42 te chu NQAS certificate nei tawh an ni a. Tunah hian sawrkar damdawi in 19-in state level certificate neiin national certificate result nghak mek 2 an awm bawk.
Health Minister Pi Lalrinpuii chuan India ram damdawiin tha tehna a tling thar Mizorama sawrkar damdawi In kan neih belh zel chu lawmawm a tiin Thawktu zawng zawngte chungah lawmthu a sawi a ni. (DIPR)
