Dr.Keneth Chawngliana’n Lunglei chu Second Capital anih avangin loh theihloha ngaihpawimawh a ngai, a ti

24 Sept 2026: Vawiin chawhnu dar 1:00 khan Mizoram State Planning Board Vice Chairman Dr.Keneth Chawngliana chuan Lunglei High Powered Committee Office a tlawh. YMA Sub Hqrs hruaitute leh MJA hruaitute nen inkawmhona hun hmangin, MLA pathum Pu Lalramliana ( Papuia ), Pu T.Lalhlimpuia leh Pu V.Malsawmtluanga, HPC Vice Chairman te bakah LMC Vice Chairman Pu K.Lalrinawma, HPC Member-te leh ZPM Southern Hqrs hruaitute an tel a ni.

Inkawmhona Pu V.Malsawmtluanga MLA kaihruaiah hian Dr.Keneth-a State Planning Board Chairman chuan, Lunglei chu Second Capital anih avangin loh theihloha ngaihpawimawh a ngai a, tunhma atangin mithiam awmna anih bakah Politics-ah phei chuan dinhmun pawimawh tak chelh, Party-te chet thatna tura sulsutu niin, eng sawrkar tan pawh ngaipawimawh loh theihloh a ni a ti.

High Powered Committee Lunglei tana siam hi rorelna nghet leh inrelbawlna hranpa neih ve tul tihna avanga siam a ni Dr.Kemeth-a chuan tiin, Lunglei hi eng sawrkarah pawh a sulsutu a ni zel a ni a ti.

Ram hmasawnna kan thawh kawngah Media lam leh NGO te chu sawrkar hian a rawn reng a ni Dr.Keneth-a chuan tiin, HPC hmanga hnathawh kawngah pawh Lunglei Dist-in hma a sawn chuan Mizoramin hma a sawn a ni tih kan hriat a, NGO leh Media-te nen pawh thawhhona tha neih a tul hle a ni a ti.

HPC leh LMC bakah State sawrkar hmalakna nen phei chuan Lunglei chu nasa taka hmasawn thei a ni tih hriat a pawimawh Dr.Keneth-a chuan tiin, High Power Committee a thawktute pawhin an mawhphurhna bik Lunglei Dist hmasawnna atan theihtawp chhuah se a duh thu a sawi bawk.

ZPM sawrkar chu P.C atanga telte tihloh chu tawn hriat la nei ngailo deuh vek MLA te an ni a, heti chung hian an thawk tha viauin kan hria a, an fellohna leh tih diklohnaah te erawh insawisel mai lo va infinchhuah thin turin NGO leh Media te chu Dr.Keneth-a hian a ngen a ni.

YMA Sub Hqrs Lunglei hruaitute leh MJA Lunglei hruaitute pawhin Sawrkarin Lunglei a ngaihsak tawhnaah lawmthu an sawi rualin, Lunglei hmasawn zelna tura an ngaipawimawh, HPC Budget tih pun belh zel leh thil dangte an tarlang bawk.