06 Jan 2024: Vawiin chawhma khan Lunglei DC Conference Hall ah Deputy Commissioner leh District Election Officer ni bawk Pi Ramdinliani, IAS kaihhruaiin Lunglei District Draft Electoral Roll 2024 tlangzarhna hun hman a ni. Pi Ramdinliani chuan Lunglei District Draft Electoral Roll 2024 chu tlangzarhna neiin, Political Party hrang hrang te hnenah Soft leh Hard copy semna nei in YMA, MHIP, MJA leh Akashvani Lunglei te hnenah Soft copy a sem nghal bawk. He hun ah hian ERO, AERO, Election kaihhnawih official bakah Akashvani, Lunglei, YMA, MHIP leh MJA te bakah Political Party aiawh te an tel a ni.
Pi Ramdinliani chuan Lunglei District Draft Electoral Roll 2024 a hun taka tlangzarh thei tura buaipuitu election kaihhnawih official te thawhrimna chu fakawm a tih thu a sawi a. India khua leh tui vote nei thei chin kan nih chuan vote thlak hi kan dikna chanvo leh kan mawhphurhna a ni tiin kum tling thar te leh roll a hming la thun lut lo te pawh he Summary Revision hun chhung hian in ziak lut ngei turin a sawm a ni. Electoral roll dik leh felfai kan neih theihna tura hmalakna ah official te, NGO, khawtlang hruaitu te leh Political Party hrang hrang te chung ah lawmthu a sawi bawk a ni.
Draft Electoral Roll in a tarlan danin Lunglei District chhunga ni 6.1.2024 a voter awmzat chu mi 100122 niin mipa 49647 awmin hmeichhia 50475 an awm a, Service voter awmzat chu 556 an ni.
Hetih lai hian Aizawl District-a voter awmzat chu a vaiin 2,86,813 niin, mipa 1,34,259 leh hmeichhia 1,52,554 an awm a ni.
Dt 06.01.2024 – 22.01.2024 chhung hian hming thunluh ngai, paih ngai leh siamthat ngaite tan dilna hun hawn a ni ang, heng dilna lutte hi ERO/AERO ten an enfiah ang a. February 2, 2024 ral hmain Form lutte hi chinfel hman tur a ni a. February 8, 2024 ah Final Roll tarchhuah a ni ang.
