17 June 2025: Lunglei District Consumers Association (LDCA) hruaitute chuan vawiin khan electric bill chungchangah Er. Peter VL Malsawma EE, Power Maintenance Division I Lunglei chu a office-ah an hmu a, tunhnaia electric bill sang avanga consumer-te’n an hriat thiam loh thu leh mak an tih thute an thlen.
Er Peter VL Malsawma hi SDO pahnihin an tawiawm a, Consumer hruaitute hnenah P& E hotute chuan, Department an la inpeih lo chungin, Central sorkarin system thar hmang tura a tih avangin, electric bill siam danah tun hmaa Ni 30 chin siam thin chu, Ni 45 velah siam a ni a, hei vang hian, bill a san phah a, bill thar lokal zel turah chuan a pangngai chho leh tura an ngaih thu an sawi.
System hluiah Reader-te’n a figure tihsual palh te an nei thei a, an tihsual avanga bill chawi tlem an awm laiin, meter-ah a kal vek si avangin tuna system tharah meter thlalak nen veka thawn a ngai a, a hmaa an lo chawi kim loh avanga chawi tam ta te pawh an awm thei a, bill lokal leh zel turah chuan a dik chho tawh tura an ngaih thu an sawi.
LDCA hruaitute chuan, system thar hman a nih tak avangin thil thar engemaw zat a awm a, hengte hi mipuiah hrilh hriat a tul a, P&E deptt-in awareness an neih tam a ngaih thu an sawi a ni.
