21 April 2024: Lunglei Electric venga Football field siam meka phullem phah, football field atan standard size tling lo chungchangah Electric veng Local Council, YMA leh Lunglei District Football Association (LDFA) te an lawm lo hle a, he football field siam mek hi Inrinni khan a hmunah an enho a ni.
He football khelmual siam tur hian Electric veng khawtlang hruaitute’n hma an la a. Mipuiin pawisa thawhkhawmin mual hmun tur hi leiin an lai zawl nghal a, sorkar kalta (MNF) khan Phullem phah tura project siam sakin, Mizoram State Sports Council (MSSC) chuan enkawlin Decor India, Guwahaty chu Contractor an ni a, estimated amount chu Rs nuai 800 a ni.
Thudawnnain a sawi danin Electric veng YMA, Local Council leh LDFA-te hian Contractor hnenah hian levelling an tih zawhah khan phullem hi standard size tling ngei tura phah tur leh chumi anih loh chuan phullem hi phahlo tur leh mual hung (fencing) pawh ti lo turin an hrilh. Hei bakah hian Sports Minister Pu Lalnghinglova chu a hmunah thil awmdan enfiah turin an ngen tawh tih an sawi.
Inngaichang tawn renga an awm laiin Contractor hian phullem chu phahin line marking-te an siam vek tawh a, fencing pawh an peih thawkhat tawh a, a dung 100m leh avang 60m in an chhuah ta a ni. Football field lenzawng tur hi a pawm theih chin hniam ber 64mx105m anih laiin Football playground dimension puitling lova Football playground siam chu VC/YMA/LDFA te chuan tha nat thlak an tiin hnathawh hi chawlhsan rih phawt se an duh thu an sawi.
Electric veng khaw tlang hruaitute chuan mipuiin sum an thawhkhawma hma la an nih angin mual hmantlak, a teh tling ngei chu an duh a ni tih sawiin, mual chu siamthat dan kawng awmse an duh tih an sawi a ni.
