Fur lo thleng tura chhiatna hrang hrang thleng thei laka himna atana inpuahchahna sawi ho
01 April 2025: Vawiin khan kumin fur lo thleng tura chhiatna hrang hrang thleng thei laka Lunglei District himna atana inpuahchahna hrang hrang sawi hovin Lunglei District Bawrhsap & District Disaster Management Authority (DDMA) Chairman Pi Navneet Mann hovin Lunglei DC Conference Hall-ah ṭhut khawm buatsaih a ni.
Lunglei DDMA Chairman Pi Navneet Mann chuan hmasawnna hna thawh hrang hrangte chu fur thlen hmaa thawh zawh a nih theih nan leh chhiatna thleng thei laka himna turin works department-te leh a bikin kawngpui zauh hna thawh mek enkawltu NHIDCL te chu chak taka hma la tura chahin, department hrang hrangte pawh eng, tui, kawng, buhfai, ni tin mamawh, hriselna kaihhnawih leh thil dangah fur laia harsatna a awm loh nan mahni zawn ṭheuhvah inpuahchah turin a chah a. Fur laia lei min, kawng chhia leh chhiatna chi dang a thlen thulhah DC Office-a District Emergency Operation Centre (DEOC)-ah report vat ṭhin turin District mipuite chu a chah bawk a ni.
He hunah hian DDMA member-te, sawrkar department hrang hrang official-te, Assam Rifles, BSF leh NHIDCL aiawhte an tel a. Chhiatna thlen thulha report-na turin DC office-a DEOC chu phone number 9862653478-ah eng tik lai pawha biak pawh theih a nih thu tarlan a ni. Chhiatna thleng thei laka invenna tur leh a thlen thulha rang zawka chet lak a nih theih nan zonal officer-te’n an huam chhunga chhiatna thlen ṭhinna hmun te enfiahin report lo siam se tih niin, hmun hrang hrangah tawm himna hmun (safe shelter) leh veivahna kawng (evacuation route) ruahman ni se, tih a ni a. Chhiatna laka himna atana tih tur leh tih loh tur bakah, biak pawh tur number-te chu zau taka puanzar ni se, tih a ni bawk.
