28 Feb 2024: Health & Family Welfare Minister Pi Lalrinpuii chuan vawiin chawhma khan Civil Hospital, Aizawl ah hospital tihchangtlunna tur thil pawimawh tak tak – Biometric Attendance, Medical Record Digitalization, CCTV, Hospital Pharmacy, Jan Aushadhi, Hospital Website, Online OPD Registration & UPI Payment, SMS Lab. Report, OPD Ticket Counter leh HIV Viral Load Machine te chu a tlangzarh a ni.
Health Minister chuan natna enkawlna kawnga hmasawnna pawimawh tak tur vawiinah tlangzarh a ni thei chu lawmawm tiin tangkai taka hman a nih hlawm a beisei thu a sawi a. Thawktute chu mipui rawngbawltu an nih hre reng chunga theihtawp chhuah a hna thawk zui zel turin a chah a. “Mipui min mamawh tute avanga he department a awm hi kan ni a, min dawrtute hi kan tana mi pawimawh te an ni, chuvangin tute pawh i ngaipawimawh ang u” a ti.
Vawiin programme hi H&FW Principal Secretary Pi Esther Lalruatkimi chuan a kaihruai a. Sr. Medical Superintendent Dr. Zoramthanga chuan report a pe a ni.
Report-a tarlan danin, Biometric attendance hi thla 1 vel trial run neih anih hnuah mumal zawk a hman tan a ni. Hospital damlo zawng zawng te an record kimchang kum 10 chhung dah that anih hnuah kum 10 chin bak chu hal ral zel a ni thin a, heng damlo history record vawn that te hi research tih nan leh thil dang atan mamawhna alo awm tak zel avangin December, 2023 thla atang khan digitalized a ni a, hei hian record tam tak rei tak tak te pawh him takin a vawng tha tawh dawn a ni.
