14 Sept 2024: Kawng chhia avanga Tuialhthei phur Tanker te kawng lakah an tangkhang nasat avangin Aizawl leh hmun danga Filling Station te’n petrol leh diesel hralh tur an nei mang tawh lo. Doordarshan palai zawhna chhangin All Mizoram Petroleum Dealers’ Association (AMPEDA) President Pu Lalnghakliana chuan tunah hian tuialhthei phur tanker te chu Kawnpui leh Khamrang inkar kawng chhiaah an tang deuh vek a, pahnih khat Aizawl thleng a awm leh zauh thin tih sawiin, hemi avang hian filling station tam zawkin oil hralh tur an nei mang tawh lo tih a sawi a; mipui mamawh phur lirthei tangkhang awm zel tur ti ziaawm turin chak zawkin sorkarin hma a lak a tul hle ni a an ngaih thu a sawi.
AMPEDA President chuan tuialhtheia harsatna kan tawh fo thin tih ziaawm nan kan ram chhungah Oil Depot neih kan mamawh hle tih sawiin, kawngchhia emaw thil dang harsatna emaw thleng a awma, heng harsatna kan tawh fo thin tih ziaawm nan Oil Depot-a thlakhat daih tal kan neih chuan heng harsatna hi kan pumpelh thei ngei ang tih a sawi bawk. (DDK)
