14 Jan 2024: Nizan khan Sakawrdai SDPO hmalaknain Darlawn dai-ah ramdang atanga tawlh ruk kuhva hring truck pahnih man a ni.
Thudawn danin heng kuhva hring phurtute hian niminah Champhai an chhuahsan a, Police Check gate helin Khawbung atangin Biate lamah an kal a, Sakawrdai SDPO leh a hote hian Darlawn daiah lo changin an lo man a ni. Mizoram Home Minister Pu K. Sapdanga chuan social media kaltlangin Kuhva tawlhruk titawp tura theihtawp chhuahtu Police te chungah lawmthu a sawi a, Kalphung thar hmel mipuiin an hmuh theihna turin Home Department-in hma an hruai zel dawn tih sawiin a thawktute pawh an tang hle tih a sawi. Home Minister chuan ‘Rule of law’ chu a nihna anga hmang tur chuan kan hremna dan pawh a chak tel a ngai a, thawk tha te ngaihhlutna leh thil dik lo titute hremna a awm tel a ngai tih a sawi.
Home Minister chuan sawrkar kal dan tur mipui leh sorkar hnathawkte’n an hriat theih na’n, sorkar atanga ‘Order’ a chhuah hma atang hauhin a theih anga tam sawiin, news leh social media lamah an tichhuak chunga dan pela kal an lo la awm chu pawi a tih thu a sawi bawk. Pu Sapdanga chuan Sorkar hnathawkte chep taka siam an tum lo tih sawiin danin a phal chhungah zalen taka hnathawk thei tura siam chu an duh ber tih sawiin hremna lek ngai tawh lo se an duh a ti a, khawng takin an kal zel dawn tih a sawi.
Mizoram Police chuan Nilaini khan Vairengte Police Checkgate-a duty Police officer pahnih an suspend a, Vairengte OC leh constable 6 an sawn chhuak bawk. Thudawn danin heng mite hian dan bawhchhia-in January ni 5 khan Vairengte Police Checkgate ah hian hnam dang driver laka dan loa pawisa lak a awm ni a hriat a ni a, hemi kaihhnawihah hian January ni 5-a duty Police SI leh ASI chu suspend niin, OC bakah Constable paruk transfer an ni.
Dan lo a pawisa lak chungchang hi chhui chian a ni dawn a, a tul anga hmalak chhunzawm a ni ang. (AIR)
