14 Nov 2023: November ni 26, 2023 thleng awh tur ZOHANCO buatsaih State Handloom Expo chu vawiin khan Convention Centre Lungleiah Lunglei D.C Pi Ramdinliani’n a hawng.
Khuallian Pi Ramdinliani chuan Mizote hi kan mit a fingin kan kut a themthiam em em a, khawvelah pawh kan zahpuiawm lo tih Pi Ramdinliani chuan sawiin, khawvel hnamdangte duhzawng leh ngainat zawng hre rengin kan eizawnna pawh kalpui thiam ila chu chuan hmasawnna leh hlawhtlinna sang zawk min thlen ngei ang tiin kan Market hi Mizoram chhung leh ramdang atanga mikhual kan neihte chauh ni lova India ram chhung hmun hrang hrang leh khawvel hmun dang thleng phak Market nei turin Puantahtute pawhin tan la zel se a duh thu a sawi a ni.
He hunah hian Pu C.Lalrammawia, Chairman, ZOHANCO pawhin thu sawiin, intodelhna kawngah Handloom leh Handicraft hi kan tih theih ber zing ami a ni tiin, Mizoram bik tan phei chuan Central atanga min thlir sak pawhin helam hmanga eizawnna kawng zawh hi kan hlawhtlin pui theih ber tur zinga an ngaih a ni a ti. Kuthnathawha eizawnna hrang hrang zingah Handloom leh Handicraft hi eizawnna ngelnghet leh zahawm ber a ni tiin kan uar deuh deuh angai a ni a ti a, tawlhloh puan leh thangchhuah diar chu hnamdang hnena pek chi a ni lo, a ti bawk.
