February 19, 2024: Sports Minister Pu Lalnghinglova Hmar chuan Aizawla mipa football inelna chu tun Khelo India University Games kal mekah hian a hlawhtling ber a nih a beisei thu vawiina Khelo India University Games 2023 mipa football inelna a hawnnaah a sawi.
Pu Lalnghinglova Hmar chuan team pariat inel turte chu state pali atang chauha lokal an ni tih sawiin, hei hian football inelna chu inelna dang ang ngawt a nih lohzia a lantir tih a sawi a, India rama Traditional Football Power House tia hriat hlawh Kerela, Punjab, W. Bengal leh Maharashtra atanga University Football team an rawn tel thei chu lawmawm a tih thu sawiin, football hmangin infiamna mawi lantir mai bakah inunauna tha siam a nih ngei a beisei thu a sawi a ni.
Ministry of Youth Affairs and Sports, Sports Authority of India (SAI), Association of Indian Universities, Indian Olympic Association leh National Sports Federation-te tangkawp buatsaih Khelo India University Games (KIUG) 2023 hnuaia mipa football inelna hawnna hun Rajiv Gandhi Stadium, Mualpui-a neihah hi Sports and Youth Services Department Secretary Pu Lalramsanga Sailo chuan a kaihruai a, report petu Competition Manager Pu Lalrengpuia chuan Guwahati, Assam-ah a inelna pui ber chu neih a nih thu leh, Mizoramin inelna pakhat Football a lo thlen ve thu a sawi. (DDnewsmizoram)
