24 Nov 2023: Vawiin hi Presbyterian Kohhran te nî pawimawh pakhat ‘Kohhran Hmeichhe Nî’ vawi 27-na a ni a; Presbyterian Kohhran Hmeichhia-te chuan hemi pual hian bial leh tualchhung kohhran-ah te tha an tih angin hun an hmang. Kumin ‘Kohhran Hmeichhe Nî’-ah hian thupui inang tlâng “Kristian Nu Tha” tih Synod Secretary Upa B.Lalhmunliana ziak an zir a ni.
Kohhran Hmeichhia hi Zosap Rev DE.Jones-a nupui, Pi Catherine Ellen Williams (Pi Zosaphluii)-in kum 1904-ah a din a. Mizo hmeichhia, a bik takin nu te chu Pathian thu te hrilhin, kutthemthiam leh hriselna lam te a zirtir a. Hun kal zelah Bible Women-te nen thawkhovin Presbyterian Kohhran-a tualchhung kohhran tinah Kohhran Hmeichhia a lo ding zel a ni.
Kohhran Hmeichhe Inkhawmpui Lian-in ‘Kohhran Hmeichhe Nî’ bik neih a rel a, Synod Executive Committee (SEC)-in November thla Zirtawpni hnuhnung ber chu ‘Kohhran Hmeichhe Nî’ atan hman nise tia a relsak angin kum 1997 atang khan hman tan niin, Synod Calendar-ah pawh Synod nî pawimawh zingah dah tel a ni.
‘Kohhran Hmeichhe Nî’ atana November thla Zirtawpni hnuhnung ber hman a nih chhan hi Pu Zosaphluia’n a diary-ah Pi Hluii’n Zirtawpni-ah hmeichhia-te chu inkhawm a neihpui thin tih a ziak a. Inkhawm a neihpui tan nî chiah hi sawilan a ni lova, January 1904-ah Mizorama lo chhuak kha a ni a, a lo chhuah kum tawp lamah chuan hmeichhia-te hi bul a tanpui tawh ngei ang tih a rin theih a. Chuvangin, Pi Zosaphluii Mizorama a lo chhuah kum tawp lam November thla Zirtawpni hnuhnung ber chu ‘Kohhran Hmeichhe Nî’-a hman turin Synod Executive Committee (SEC) chuan remtiin, kum 1904 chu Kohhran Hmeichhe din tan kumah a pawm nghal bawk a ni.
