Kolkata Ballygunge Mizoram House leinaa Pu Ramthansiama inhnamhnawih anga puhna a a kaikuang Police-te’n chhuichhuak
17 April 2024: Chief Minister hlui Pu Zoramthanga fapa Pu Ramthansiama Kolkata Ballygunge Mizoram House leinaa inhnamhnawih anga puhna a a kaikuang ber Police-te’n chhuichhuakin Court thuremna nghah mek a ni.
Pu Ramthansiama hian kumin January ni 18 khan HT Lalmawizuala, Judicial Magistrate, Aizawl District Court-ah Criminal Complaint a thehlut a, court chuan Officer-in-Charge, Cyber Crime Police Station Aizawl hnenah chhui chiang turin a hriattir a. Cyber Crime chuan March ni 26 khan an chhui zawhna ‘Investigation Report’ chu Court-ah an thehlut a. Hemi chungchanga thu thehdarh siamtu chu Zosangzuala (Sena Zote) Phullen khua ani tih Cyber Crime Investigation report chuan a tarlang.
Zosangzuala hi damlohna avangin Court-ah ala inlan thei lova, hei vang hian court thuremna pawh nghah mek a ni. (DD)
