## 17 April 2024: ZPM General Secretary Pu Eddy Zosangliana Colney chuan kum 2024 MP inthlan lo awm tura MNF Party official candidate Pu K. Vanlalvena hnena ram pek chu Luangmual Industrial Department ram a nih thu a sawi.
He thu hi vawiina Aizawl Press Club-a chanchinbumite a kawmnaah ZPM General Secretary chuan a sawi a. Pu K Vanlalvena hnenah kum 2022, MNF Ministry hun lai khan In hmun, LSC pek a ni tih sawiin he in hmun, LSC No. CAD 178 of 2022, square meter 229.39 a zau, Luangmual High School Veng, Aizawl-a mi chu Luangmual Industrial Department ram a nih thu RTI chhannaah tarlan a ni a ti.
ZPM General Secretary chuan ram hruaitu langsar tak, Rajya Sabha MP ni lai mek leh Lok Sabha MP thlanna hmachhawn tura MNF Official Candidate ni bawk Pu K. Vanlalvena hnena MNF Ministry-in Dan pawh zah zo lova LSC a pe chu ZPM chuan pawi a ti takzet tih a sawi a. Hetianga dik lo taka ram pek neitu, ram hmangaihtu nia inchhal Pu K. Vanlalvena chuan a hmangaih Zoram hnenah Dan lo anga a ram neih chu a hlan let leh ngei ZPM chuan an beisei tlat thu a sawi a.
Naktip, April ni 19 a MP (Lok Sabha) thlan turah ZPM Official Candidate Pu Richard Vanlalhmangaiha vote sak theuh turin Zoram mipuite thinlung leh tih takzeta a sawm thu ZPM General Secretary chuan a sawi bawk a ni.
## 17 April 2024: Lok Sabha inthlanpui atana Congress party candidate Pu Lalbiakzama chuan Mizo Ram, Hnam leh Sakhua chu BJP leh a sangawizawn puite rorelna hnuaiah hian a him lo ta takzet a ni a ti.
Pu Lalbiakzama chuan India ram hmun hrang hranga thil thlen dan leh, Prime Minister leh Home Minister te thil tih duh leh tih duh loh te, an tawng chhuah duh leh duh loh danah te hei hi rinhlelh rual loh in a lang tih vawiina Aizawl Press Club-a chanchinbumite a kawmnaah a sawi a. India ram innghahna thulaibu (Idea of India) tih nghinin a awm a, India ram Danpui constitution leh Democracy pawh palzut mek a ni a ti a. Hindu kulmuk ten One Nation, One Religion, One Culture din an tum mek chu thu leh hla a dodal theih a nih lai hian theihtawp chhuah a ngai a ni a ti a.
Hei vang hian BJP leh a thurualpui te paih thla theitu chu India ramin zalenna a neih tirha ram Danpui, Constitution lo duang tu Indian National Congress leh a thurualpui te chauh an ni a ti a. An kut ti chak tur leh Ram, Hnam leh Sakhaw him zel na turin rilru fimtak nen mitin te vote thlak tura a ngen thu a sawi a ni.
## 17 April 2024: Mizoram BJP te chuan vawiin khan an State Secretary Dr. Zonuntluanga hoin Aizawl Press Club-ah chanchinbumite an kawm a, MP General Election 2024 lo awm turah Mahatma Gandhi duh dan angin Indian National Congress chu an dawt sawi nen India mipui te’n an tih tawp dawn thu an sawi.
BJP hruaitute chuan Congress chu ICU-ah ventilator hmangin an la nung ve tawk tawk a, hun tlemte an la neih chhungin BJP nasa takin an bei a ni an ti a. Tunhnaia India rama thil thleng hrang hrang leh dan hrang hrang siam that tum chungchangah Congress in BJP chu nasa takin dawt hmangin a puh tih an sawi a. Kum 1948 January ni 27 khan Mahatma Gandhi a’n thu ro chhiah a nei a, chu chu Congress party tihtawp tawh tur tih a nih thu an sawi a. BJP hruaitute chuan BJP in Congress kih hnawk thian fai chungin ram an kaihhruai thu leh tih tur a la tam thu an sawi a. India ramin hma a sawn ve zel thu leh ram hausa 3-na a nih thuai dawn thu an sawi a.
India zalenna in kum 100 a tlin hun, kum 2047-ah chuan khawvela ram hausa ber a ni thei dawn an ti a. He movement hi Mizoramah pawh a hlawhtlin theih nan BJP Candidate Pu Vanlalhmuaka chu vote vek turin mipuite an sawm a ni. (AIR)
April 17, 2024 : Mizo National Front, MNF Party Treasurer leh Media & Publicity Board Chairman Pu Lalruatkima pawhin Aizawl Press Club-ah thuthar lakhawmtute kawmin Lok Sabha Inthlanpui a an party aiawha ding Ram leh hnam veimi, nationalist rilru pu Pu K Vanlalvena vote turin mipuite a sawm.
MNF Treasurer Pu Lalruatkima chuan MNF MP Candidate Pu K Vanlalvena chuan Rajya Sabha MP anih chhungin Parliament chhung leh pawnah ram, hnam leh sakhaw himna turin theihtawp a chhuah nasa tih mipui ten an hriat vek thu a sawi a. Ram rorelna sangah tum 15 thu a sawi thei chu tun hma lama MP ngawi reng te thlak danglam anni tiin mipuite chu ngaihtuahna fimtak pu turin a sawm a ni. Pu Lalruatkima chuan MP candidate te zingah sawisep kai an awm chu pawi a tih thu sawiin kohhran zirtir dan leh duh danin ram aiawh tur thlanaah duhtui turin mipuite a ngen a. India ram rorelna sanga ding tura mi huaisen MNF MP Candidate Pu K.Vanlalvena vote theuh turin mipuite a sawm a ni. (DD)
