01 Dec 2023: Kristiante Ni serh humhalhna punkhawm vawiin khan Mizoram hmun hrang hrangah huaihawt a ni.
Mizoram Assembly Inthlanna vote chhiar hun tura ruat sawn tura Election Commission of India hnena ngenna hlawhtlinna hmuh anih loh avanga All NGO Coordination Committee ten an huaihawt Kristiante Ni Serh Punkhawm hi vawiin khan District hrang hrangah neih a ni a, Aizawl ah chuan Raj Bhavan kawtah hun hman niin party hrang hrang aiawhte pawhin he hun hi an tel pui a ni.
All NGO Chairman leh Central YMA President Pu Lalhmachhuana chuan Mizo Kristian te chu in lungrual a pawimawh tih sawiin Kristian te ni pawimawh humhim turin mi tin te tanrual a pawimawh a ti a, Mizo Kristian hrang hrang ten vawiina an hun hman tullo tia an sawi chu a pawi takzet tih sawiin tanrual tul hun laia ngaihdan hrang lo awm chu Kristian te in enfiah a pawimawh takzet tih a sawi a, vawiina hun hma naah an beisei anga thawkchhuak an tamlo chu pawi a ti tih a sawi bawk.
Pu Lalhmachhuana chuan ECI in vote chhiar ni a rawn ruat atangin party hrang hrang leh Tlawmngai pawl bakah kohhran ten an duhlohna an thawn a ti a, an ngenna in awmzia a neihloh avang leh chhanna an hmuhloh avangin Delhi ah anmahni ngei hmua ngen turin an kal a ti a, an kal dawna helai ECI mi leh sa CEO ten appointment an hmuh theihna tura an pui tha tawklo chu a lungawi thlak lo tih sawiin Mizote ngaih pawimawh an hlawhlo hle tih a sawi.
All NGO President chuan Kristian sakhua a him loh chuan mizo hnam pawh a him theilo tih sawiin ECI in mizote kil hrang hranga an ngenna chhan tlakah a ngailo chu pawi atih thu sawiin vote chhiar ni ah an duhlohzia lantir nan political party tin te pisa hawnglo turin a duh a ti a, party mi leh sa te pawh inthlan kaihhnawiha duty annih loh chuan inkhawm tibuaia inhnamhnawih lo tura ngenin candidate tling te pawh Pathianni-a certificate la lo ngam turin an duh tih sawiin Mizo mipuite inlungrualna lantirna hun a ni tih a sawi.
Vawiina kalkhawm te hian Resolution siamin ECI chuan vote chhiar hun atan Kristian te ni pawimawh a ruat chu tha anti lo takzet tih sawiin vote chhiar ni December ni 3 chu sawn ngei turin an ngen nawn tih an sawi bawk.
Vawiina Kristiante Ni serh punkhawm ah hian MKHC hotute leh MZP leh MSU bakah MHIP President theuh ten thu an sawi a, District hrang hrangah pawh hman a ni bawk. (AIR Aizawl)
